1\1\ 1990 : فاكر اليوم ده يا مينا , لما مامتي ومامتك رقعوا بالصوت في نفس الوقت وجريوا بيهم على المستشفى , واتولدنا أنا وإنت في يوم واحد , في ساعة واحدة , في مستشفى واحدة . لما نقلنا حياتنا لإسكندرية مكناش لاقيين مكان يتاوينا , عمو أجر لنا الشقة اللي قدامكم اللي كان سايبها لمايكل أخوك يتجوز فيها , وبقينا ساكنين أدامكو , بيتنا مفتوح على بيتكو وبيتكو مفتوح على بيتنا, وبابا شارك باباك في المخبز وأخيرا بقى لينا مكان استقرينا فيه بعد ما كنا في كل حتة شوية , أهلي وأهلك حسوا إنهم استفتحوا بينا حياة جديدة وكنا وش السعد عليهم . وكل سنة بعد ما تيجي من الكنيسة ليلة رأس السنة , ماما تكون مجهزة التورتة ونحتفل بعيد ميلادنا , والعيلتين تقضيها للصبح فرح وسعادة ومرح وهيصة وزنبليطة . فاكر يا واد يا مينا لما بابا عرف إني بحب أحمد ابن الجيران وزعقلي وضربني وحبسني في البيت , وباباك زعقله عشان عمل معايا كده وكنت إنت وجاسيكا أختك واقفين جنبي وبتواسوني , ولما دخلت في مود الإكتئاب والإحباط مسكتني من كتافي وهزتني وزعقتلي " فوقي وبصي لنفسك وادعي ربنا وصليله " لأني وقتها كنت مقاطعة الصلاة , وجاسيكا جابتلي القرآن وقالتلي اقعدي اقري وادعي ربنا , كنتوا أكتر ناس حاسين بيا وحاسين بحالتي وحاسين بالقرف والخنقة اللي كنت فيهم . محمد أخويا كان دايما يتخنق مني لما أطلب منه يجي معايا نشتري لبس , ولازم نرجع البيت متخانقين , طب أعمل ايه مهي اللف والفرجة بتاخد وقت وبتأخر عن البيت وهو بقى يتخنق مني , فكنت دايما بقولك انت وجاسيكا تيجوا معايا وتكونوا جنبي , وكنت ببقى مبسوطة وانت بتقولي ده حلو وده وحش , فاكر الفستان اللي كنت بقيسه وكان عاجبني أوي وانت قولتلي لأ ضيق وكنا هنتخانق في المحل ؟؟ فاكر لما جاسيكا ولدت ؟؟ فاكر ليلتها إيه اللي حصل ؟؟ , مكنش فيه غيرها هي وطنط في البيت وكنتم كلكم برة , وبابا اللي خدها ووداها المستشفى , وجابت بنوتة أمورة أوي , وماما قالت نسميها مريم , وطنط قالت آه نسميها مريم , وجاسيكا قالت نسميها مريم , فاكر صورة العدرا اللي جبتهالك من الحسين في عيد ميلادك اللي فات , وانت جبتلي آية الكرسي منقوشة على الخشب . 1\1\2011 ماما قاعدة بتعمل في التورتة , ومريم نايمة جوة على سريري , كله راح الكنيسة طنط وعمو ومينا ومايكل وجاسيكا وجوزها , وسابوا مريم لأنها كانت نايمة , وأنا قعدة أزوق في البيت وأحط صورنا في كل حتة , وبوضب الهدية بتاعة مينا , بابا جه وجايب معاه الكحك والحاجة الساقعة وطبعا جاب عيش السرايا اللي مينا بيحبه , انا مش عارفة هو بيحبه على إيه , المهم إني مستنية عمو عشان جايبلي معاه المشبك اللي بيوصي عليه مخصوص من دمياط عشان خاطري أنا . طبعا الدنيا صيام , وماما بتعمل كل حاجة من أولها لآخرها صيامي , هو صحيح بيبقى طعمها غريب بس الفرحة واللمة بتخلي كل حاجة حلوة وكأنها جاية من الجنة . الصبح أنا ومينا اتمشينا على الكورنيش , افتكرنا ذكريات الطفولة والمدرسة والهطل اللي كنا فيه اول ما دخلنا الجامعة , واحنا كنا متفقين إننا نعقل لما نتم 21 سنة ونبطل شغل العيال اللي بنعمله ونبقى ناس كبار , بس طبعا كله كلام في المشمش . هي دي هديتي ليك السنة دي يا مينا , رسالة , مجرد رسالة فيها أهم أحداث كانت بيني وبينك وأثرت فينا , أنا حاطة شوية صور مسخرة طبعا من أول ما اتودلنا لحد ما دخلنا الجامعة . 12:20 صباحا : " انفجار سيارة مفخخة بجوار كنيسة القديسين بالإسكندرية " حبيت أدخل أوضتك وأشوف هديتك وأعرف إنت جايبلي إيه , مش معقول تكون جايبلي نفس الهدية ونفس الصور وفاكر كل حاجة زي ما أنا ما فاكراها . أنا أخدت صليبك اللي كنت معلقه على باب أوضتك وعلقته على باب أوضتي . هنيئا للأرض أن احتضنتك ... ! بس أنا مش عارفة يا مينا ازاي هقضي عيد ميلادي تاني , ازاي هفرح تاني , ازاي هنبسط تاني , ازاي هنفضل نجهز في التورتة واكون مستنية عمو بالمشبك , ومعقولة بابا هيبطل يجيب عيش السرايا اللي أنا مش بحبه ؟؟ ومريم هتكون من غير أم , ومايكل مش هنشوفه , طب ماما هتبطل تشرب القهوة مع طنط , طب المخبز هيكون من غير عمو ؟؟ هو بجد ده حصل يا مينا ؟؟؟ بجد انت مش هتكون موجود ؟؟؟ خلاص يا مينا ؟؟!! مأخدتنيش معاك ليه يا مينا ...