الحقنة ..! عبد العزيز محمود

كانت عدوانية الطرمباوي واشتباكه عمال على بطال مع خلق الله ظاهرة غير طبيعية تؤرق الجميع، حتى جاء يوم اقتنع فيه هو شخصيا بضرورة اللجوء الى طبيب نفساني .....
-انا تعبان اوي يا دكتور عوكل ونفسيتي في الحضيض وعايز ادمر كل اللي حواليا!!
-سلامتك الف سلامة يا طرمباوي بيه!!! واضح انها كلكيعة صغيرة من ايام الطفولة ولسه ما اتفكتش!!!
-والله ما انا عارف!!! بس انا اليومين دول قرفان آخر قرف، وكل ما اشوف واحد رايق قدامي نافوخي بيضرب واشتبك معاه في خناقة لغاية ولاد الحلال ما يخلصوه من ايديا!!!!
-طيب اتفضل ريح ع الشيزلونج عشان نشوف ايه الحكاية .. واضح ان سيادتك اتعرضت لأذى جامد في مرحلة الطفولة!!!عشان كده بقيت عدواني وبراوي وعايز تنتقم!!!!!
وهنا أدار الدكتور عوكل جهاز التسجيل ..
-ايه الحكاية يا دكتور عوكل ؟؟؟ هوه انت ح تسجللي والا ايه؟؟؟
-طبعا يا طرمباوي بيه ما هي كل جلسات التحليل النفسي لازم تتسجل!!!والا سيادتك ما بتشوفش افلام هندي!!؟؟انا بس عايزك تفك كده وتريح وتفضفض لي عشان اقدر احدد العقدة اللي عندك !!!
-لالالالا سيبك من الكلام الفارغ ده وحللني من غير تسجيل!!! يا راجل هوه انا ناقص فضايح!!!!
-خلاص سعادتك أنا ح احللك ع السريع بعد ما انومك تنويم مغناطيسي!!!
وهكذا اخرج الدكتور عوكل من جيبه البندول الأزرق اللي بينوم وأخذ يحركه يمينا ويسارا امام عيني الطرمباوي حتى راح في نوم عميق ....
-عال قوي !! انت دلوقتي نايم وبتشخر وبتاكل رز بلبن مع اصحابك في الحضانة!!!
-خخخخ خخخخخخخخخخخ!!!!
-هايل انا عايزك ترجع بذاكرتك لايام الطفولة الحلوة وتحاول تفتكر ياترى فيه حد ضربك او ضايقك او مد ايده عليك!!!
-خخخخخخخخخخخخخخخخخخخ!!!!
-طيب حد قال كلام كده والا كده والا شتمك أو اهانك أو ادالك على قفاك!!!
-خخخخخخخخخخخخخخخخخخخخخخخخ!!!
-ياريت تركز معايا على مرحلة الدراسة وتفتكر كويس يا ترى حد داس لك على طرف او اشتبك معاك باي صورة من الصور؟؟؟
-خخخخخخخخخخخخخخخخخخخخخخخخخخخخخ!!
-ياااااه واضح انك تعبان اوي يا حبة عيني وعايز تنام!!! خلاص انا ح اسيبك تريح ونكمل باذن الله الجلسة الجاية!!! واهي فرصة الكلكيعة بتاعتك تهمد شوية بدال التوتر والتنشنة اللي انت فيه!!!!!
وفي الجلسة التالية....
-انا عايزك تركز معايا النوبة دي يا طرمباوي بيه على مرحلة الجامعة ياترى فيه حد من الدكاترة شخط فيك أو هزأك قدام زميلاتك في المدرج!! أو حد من زمايلك الشحوطة في المدينة الجامعية دخل فيك شمال والا يمين لأي سبب كده والا كده !!!!!
-خخخخخخخخخخخخخخخخخخخخخخخخخخخخخخخخخخخ!!
-يا عم ما تقول حاجة والا تنطق بكلمتين يوحدوا ربنا في يومك اللي مش فايت ده!!! هوه ايه؟؟؟؟ انت ما صدقت ريحت ع الشيزلونج!!!!
-ياخبر يا دكتور عوكل !! كويس انك صحيتني!!! دا كان حتة كابوس انما ايه..... منيل بستين نيلة!!! أنا شفت- وياريتني ما شفت -اني بأجرى في حارة ضلمة كحل وواحد طويل عريض ماسك عصاية بيجرى ورايا!!!!
-يا لطيف يارب ....وبعدين عملت ايه؟؟؟
-ابدا وأنا باجري ونفسي مقطوع وعينيا زايغة وحالتي بالبلا لمحت سنجة مرمية ع الارض خطفتها بسرعة وبعدين ادورت للشحط ده وحشيت وسطه وقعدت امزع في جتته ربعميت حتة!!!!!
-الف مبروك سعادتك!!! يا سلام يا ولاد مين كان يصدق؟؟؟ الكلكيعة تتفك بمعجزة وسيادتك ترجع طبيعي وهادي وما تعملش مشاكل!!
-معقولة يا دكتور عوكل ح اخف من غير ادوية ولا جلسات كهربا ولا دياولو !!!؟؟
-مش سيادتك حشيت وسط الشحط ابو عصاية في الكابوس ومزعته ربعميت حتة؟؟؟ يبقا ألف ألف ألف مبروك!!!
وبعد أسابيع ....
-الحقني يا دكتور عوكل نفسيتي تعبت تاني ورجعت اتخانق زي المجنون مع كل اللي حواليا لدرجة اني بانزل في اشارات المرور أتخانق مع سواقين الميكروباس وعساكر المرور والبياعين اللي في الشارع!!!
-معقولة الكلام ده يا طرمباوي بيه؟؟؟ ما انت كنت كويس وزي الفل!!
-اعمل ايه بس؟؟؟؟ واضح ان حالتي النفساوية مش متظبطة وكل يوم حالة الهياج بتزيد وباعمل عمايل سودة!!!!
-طيب ريح سيادتك ع الشيزلونج وشخر براحتك انا النوبة دي جايب معايا الجهاز اللي بيترجم الشخير!!!!! واضح ان فيه كلكيعة تانية مستخبية في عقلك الباطن!!!
-خخخخخخخخخخخخخخخخخخخخ!!
-عايزك ترجع بذاكرتك شوية لورا ....وتفتكر كويس هل المرحوم بابا الله يرحمه ضربك بالعصاية أو الحزام أو بالجزمة بتاعته او حدفك بصحن من الصحون وانت قاعد تاكل معاه ع الطبلية!!؟؟؟؟!!
خخخخخخخخخخخخخخخخخخخخخخخخ!
-عال قوي!! طيب يا تري وانتوا في البيت كنتوا عايشين حياة هادية والا بتتخانقوا ليل نهار وصوتكم جايب آخر الشارع ؟؟؟ انا عايزك تحكي لي كل حاجة وما تتكسفش ماهي البيوت كلها مليانة مشاكل !!!
-خخخخخخخخخخخخخخخخخخخخخخخخ!!
-عظيم!!! واضح انكم كنتوا بتحبوا بعض ومتفاهمين آخر تفاهم!!! امال الكلكيعة دي جات لك منين بس؟؟؟
-خخخخخخخخخخخخخخخخخخخخخخخخخ!!
-ايوه كده قوللي !!! بابا مات وانت صغير وماما اتجوزت على طول بعد ما انتهت العدة !! طيب وماله يا اخي ماهوه ده حقها برضه والست حبت تجيب لك أب تاني يراعيك وياخد باله منك انت واخواتك!!!
-خخخخخخخخخخخخخخخخخخخخخخخخخخخخخخ!!
-ايوه فهمت!!! الراجل للأسف ما كانش أب وكان شراني وخمورجي ومزاجنجي بيضربك ويحبسك في اوضة الفيران ويلسوعك في قفاك بالكبريت واعقاب السجاير!؟؟
-خخخخخخخخخخخخخخخخخخخخخخخخخخخخخخ!!
-يا ساتر يا رب وكمان بيمد ايديه ورجليه عليك ويضربك بالجزمة !!! لاااااااا ده راجل مفتري وماعندوش رحمة ولا ضمير ولا انسانية !!!! بس انت ازاي يا حبة عيني استحملت العذاب ده كله ؟؟؟؟؟
-اهيء اهيء اهيء اهيء اهيء اهيء اهيء اهيء اهيء اهيء اهيء اهيء!!!!
-خلاص ما تعيطش سيادتك!!!! انا كده فهمت المشكلة وعرفت انت ليه عدواني وبتاع مشاكل وخناقات وتلقيح جتت على خلق الله!!! عموما أنا ح اكتب لك على شوية مهدئات ومثبطات ومهبطات وباذن الله ح تبقا كويس بس لازم تعرف ان الكلكيعة دي شديدة ويلزمها وقت عشان تتفك!!!
-خخخخخخخخخخخخخخخخخخخخخخخخخخخخخخخخخخ
-يا عم الطرمباوي اصحا أنا ورايا طابور طويل من المهابيل اللي زيك عايزين يكشفوا عشان يعرفوا الكلاكيع بتاعتهم!!!
وبعد شهور ..
-الف شكر يا دكتور عوكل انا الحمد لله اتحسنت كتير عن الأول!! بس امبارح للاسف جاتني تاني حالة الهياج وقعدت أشوت في الناس اللي حواليا واتخانق معاهم زي التور الهايج لدرجة اني بطحت واحد فيهم وعملت له تربنة في نافوخه!!!!!
-لطفك يارب!! واضح يا طرمباوي بيه انك ما بتاخدش الدوا بتاعك بانتظام!!!
-ارجوك يا دكتور عوكل تنسى موضوع الدوا وتشوف لي حل بسرعة!!! انا عندي مقابلة مهمة بكرة وما ينفعش اروحها وانا هايج بالشكل ده!!!!!!!
-خلاص انا ح اكتب لك على حقنة في النافوخ تاخدها قبل المقابلة بنص ساعة !! بس المشكلة ان الحقنة دي مقطوعة من السوق عشان محطوطة على جداول المخدرات!!!وللاسف مالهاش بديل!!! عشان كده لو قدرت تلغي المقابلة بتاعت بكرة يبقا أحسن!!!
وفي اليوم التالي....
-يعني ايه يا بني آدم مش لاقيين الحقنة!!! ده انا مكلفكم تدوروا عليها من امبارح بالليل؟؟؟
-والله سعادتك لفينا عليها في كل حتة وسألنا عليها في اسكندرية والمحافظات ومافيش فايدة!!
-يا حيوان باقولك عندي مقابلة مهمة مع الباشا الكبير بعد ساعتين!! والحقنة دي لازم أخدها فورا !!
-اطمن سيادتك باذن الله ح نلاقيها يعني هيه ح تروح مننا فين .....بس جنابك قول يارب !!!
وفي الموعد المحدد ذهب الطرمباوي الى المقابلة دون ان ياخذ الحقنة ..
-اهلا يا طرمباوي بيه!! اتفضل استريح ومافيش داعي للتوتر والعصبية اللي انت فيها دي ...سيادته ح يقابلك بالظبط بعد نص ساعة!!!
وهنا اخرج الطرمباوي الموبايل للقيام بمحاولة اخيرة....
-ايوه يا هباب البرك لقيتوا الحقنة والا لسه ؟؟انا دلوقتي قاعد في مكتب السكرتارية بتاع سيادته وعفاريت الدنيا كلها بتتنطط قدام عينيا وكلها نص ساعة وادخل ع الراجل !!!
-............................................!!!!
-لسه بتدوروا ومش لاقينها !! طيب انا عايزكم تنتظروني في مكتبي وتقلعوا الجزم والبنطلونات وتستنوني!!!وتخلوا نبوية تجهز العصاية اللي فيها مسامير والكرباج السوداني!!!!
وفور دخوله الى مكتب الباشا الكبير كان الطرمباوي قد وصل الى مرحلة التوهج فأخرج من جيبه مطواة قرن غزال واندفع كالتور الهايج ....
-عامل لي مهم اوي حضرتك ومجعوص ورا المكتب ونافش ريشك!!! جتك ستين نيلة عليك وعلى اللي مشغلينك !! على ايه الانجعاص ده كله والنفخة الكدابة!! ده انت حيا الله تنفع تشتغل جزماتي والا قرداتي والا شحات في مولد !!! عليا الطلاق بالتلاتة لأشرحك!!!!!!!!!!!!