وكنا صغار

وانا و النيل
في عصرية
ونسمة بتهمس الذكري .... ترجعني
سنين وسنين
زمان في بلدنا ع الترعة
وصفصفافة علي المية بتتمايل
شمال ويمين
وكنا صغار ..... بنات قمرات
كما الياسمين
حميدة وياجميانة
وآمنة تسوي شعر تريز
ومريم تلعب الحجلة مع سكينة
وهيلانة بتتمشي مع صابرين
ولما نجوع نروح بيت آمنة
جنب الترعة
ناكل أي شئ موجود
وطعمه يبقي زي الشهد
لو كان جبنة ..... خسايتين
ونرجع نهضم اللقمة
بلعبة لاستغماية
ونتداري ورا شجرة
مابين توتة وجميزة
نقسم نفسنا فريقين
تريز وسكينة وحميدة
وجميانة يهزوا التوتة
والباقيين يلموا التوت
وياخد الجميل يازين
ماتعرف فينا مين قبطي
ومين مسلم ؟
وحتي ف عيدنا أو عيدهم
بنفرح في العيدين الاتنين
في حد الخوص نضفر خوص
وفي رمضان نشيل فوانيس
وناخد ع البيوت لفة
نلم العادة م الصايمين
ومر العمروكبرنا
وخراط البنات عفريت
مافيش صفصافة ..ولا ترعة
نروح م المدرسة ع البيت
وفرقنا النصيب ... والقسمة .. والأرزاق
في عصرية
وانا والنيل
لقيتني بره ده كله
هنا كان فيه طريق ماشي
ماعادش طريق
وسكين تعشق التمزيق
صحابي راحوا
في دروب الزمن راحوا
زمن تحاريق
لانسمة تنعش الحران
ولاميه تبل الريق
دي هوجة ليل خدتنا بعيد
وليه الدين صبح تفريق
ماهوش توحيد
وماعرفشي جري لنا ايه ؟
نسينا إزاي؟
جمال الصحبة
وطهارة قلوب أطفال
قضوا أجمل سنين العمر
متصاحبين
ولما اقعد بشط النيل في عصرية
تجيني نسمة الذكري
ترجعني لأحلي سنين
وتنزل دمعة قلقانة
علي الخدين
أقول يابلدي كنا فين
ورحنا فين ؟
ده مع إنه
دي عصرية
ودي عصرية
وفرق كبير بين الاتنين