لو حبيتك

علي قد الشوق
مش هنلاقي قلب يساع الأحلام
ولا دنيا تدي الملهوف علي قد غناه أحضان
وأنا قلبي وسع الحواديت
مليان أبطال وجناين وبحور
والبحر حزين لساه
ومخاوي
وانشق كما لو عدي عليه المجاريح
لكنه ماسد.. ولا موجه علي
ولا غطي أثر رجليكي
من يوم ما عاودتي
وقلتي لشط الأحزان خليك
وقلعتي في عين الشمس اتحميتي
وبقيتي خلاص
مش محتاجة البحر
ولا قلع مراكب فردت للريح الروح
استنت ييجي
ماجاش
سريان المية ..الموج العاتي .. الفيضان ..الطوفان ..
أهي حاجة تغير حال ..
تبل الريق
وتوسع خرم الإبرة
لما تحسي بنفسك من قلة حيلك بيضيق
لو حبيتك
أنا قادر أحبك زي الروميو وأكتر
وقادر أقول فيكي الشعر وأغني
وأجيب النوق الحمر
بس انتي اديني الفرصة
وأنا مش ممكن أحبك موت
حبك ما يموتنيش
دقة قلبك بتصحي الشمس
فتهرب منها العتمة
وتنام النجمة تضوي علي صدر القمر السهران
وقصادنا حكاوي عن نجمه وحبت
طلعت علي وش المية عروسة بحر
...
ويا عضم اتكسي جلاليب
الجوع مش عيب
بس ماتنساش
إن ما يأذي الحب إلا الفقر المتستف جوه الدواليب
فاتصرف
واملا عنيك بالضي
املا جلدك دفا من صهد الأرض

وكفاية علينا الشجرة
نقطف منها سوا
من غير خشي لو حد يفوت
يتمدد توبك للرجلين
طايع ومريح
والراحة في نظرة عين
وف كلمة ساعة صفا تزرع فدادين
وترش الدنيا بخور
من ريحة اتنين
اتوجعوا ولموا القهر في ضحكة وراجعين.