شغلانة الأحلام تعمل إيه؟ وتيجى أوام

كنت قاعده لا بيا ولا عليا، خير الهم اجعله خير كلمنى صديق ليا على الشات، دخلنا نقاش فى نقاش، الواسطة ولا مش واسطة، والشغل، والشركات بتطلب خبرة إلخ.
من ساعتها وأنا عقلى زى المكنة؟ طب أنا عارفة أعمل، لأنى متمرنة عليه، وعملته مليون مرة.
فالحكاية بقت عادى يعنى، طب والناس تعمل إيه، قلت مفيش غير طريقة فتافيت، يعنى نكتب المقادير والطريقة، والباقى على النفس باه.
طبق اليوم، وظيفة الأحلام
المقادير:
1- تجهيز هدف ومحدد أنا عايز أشتغل إيه،
2- سيرة ذاتية متحدد فيها أنا عايز أشتغل إيه؟؟؟ومكتوبة كويس، ، ، ومفيهاش أخطاء إملائية ولا لغوية،
3- قاعدة بيانات بكل الشركات إللى ممكن تقع تحت إيدى مصادرها قلنا 140أون لاين يلوبيدج، ، ، الخ لازم نجهز كل المعلومات المطلوبة علشان الطبخة متبوظش،
4- تليفون وموبايل مشحون كارت ب25،
5- كمبيوتر،
6- وصلة إنترنت، من السيبر إللى تحت البيت
7- نوتة وقلم علشان منساش،
الطريقة :
بعد تجهيز الهدف وأنا عايز أشتغل إيه؟؟ اعمل سى فى، سيرة ذاتية يعنى،ولازم تكون واضحة، خالية من الأخطاء الإملائية واللغوية صادقة، أنا كاتبها بنفسى مش حد كاتبها لى، متراجعة أكتر من مرة الموضوع دا خليه ياخد وقته يعنى نسويها على نار هادية،
اقعد على الكمبيوتر واقفل برامج الشات وأبطل معاكسة بنات، والبنات يبطلون معاكسة ولاد،وافتح المواقع إللى قلت عليهم نجيب أرقام تليفون الشركات ونركز على الفرع الرئيسى دايما، لأن غالبا دا الفرع إلى بيبقى فيه إدارة الموارد البشرية، خلاص جمعنا البياناتالخطوة دى ممكن تاخد حوالى يومين شغل تقريبا ودا متوقف عليك يا ترى بتشتغل بجد ولا أى كلام؟
امسك النوتة بقى، افتح أول صفحة، ابتدى اكتب، ، ، أنا فلان ، واكتب كل اللى عايز أقوله للشركة إلى هكلمها الخطوة دى مهمة لأن أحيانا من اللخمة الواحد بينسى هوعايز يقول إيه، فاكتب اسكريبت يعنى تخيل الحوار مع مدير أومسئول الموارد البشرية واكتبه قدامى افتكر الخطوة دى ممكن متاخدش كتير،
أمسك التليفون، قدامى بيانات الشركات، ، ، أسمى الله وأتصل إللى حيحصل كالتالى،
هتصل، ، من فضلك ممكن أعرف اسم مدير الموارد البشرية؟ أواسم مسئول الموارد البشرية؟ مين عايزه، دايما السكرتيرة بتبقى عايزة تعمل نفسها مهمة، فتسال أسئلة غلسة، لكن إحنا عادى ولا الهوا، برضه هعرف إللى أنا عايزة، أنا فلان وعايز أبعتله فاكس مش عارف أكتب عناية مين، ، وأنا بتكلم أكون واثق فى نفسى عرفت اسمه أكتبه جنب البيانات، كده أنت جاهز،
اليوم الى بعده، اتصل بالشركات طبعا، الشركات بتشتغل من الساعة 9 للساعة 5 يعنى لازم الناس إللى بتصحى متأخر تيجى على نفسها شوية وتصحى بدرى مش هيجرى حاجة.
قدامنا البيانات، والسكريبت، اتصل.
أنا / ممكن اكلم فلان
الشركة / نقوله مين
أنا / فلان الفلانى (اسم ثنائى)
الشركة /عايزه ليه
أنا / مكالمة شخصية
يحولونى على فلان دا، مساء الخير، أنا فلان وأرص السكريبت إللى أنا كاتبه.
وأنا بتكلم ابتسامة عريضة من ودانى لودانى، صدقونى هيبان على صوتك، فبيخلى المكالمة أحسن
دا غير أنك لازم تقدم لهم عروض، زى مثلا.
أنا خريج جديد، ومعنديش خبرة، بس معنديش مشكلة أشتغل معاكو ببلاش، أحسن من قعدة البيت.
أنا خريج جديد، وبدور على فرصة أطبق فيها إللى درستة، وأتدرب معاكو.
أوضح أن الشركة هتستفيد هى كمان، يعنى هيوفر فلوس، وهياخد شاب عنده طاقة وطموح وعايز يشتغل.
أو أنى ممكن اشتغل بمرتب أقل من السوق،
أو أنى بدرس فى دبلومة وهفيد الشركة،
أنا عندى خبرة كبيرة فى مجال،
أنا كان عندى أنشطة وأنا فى الجامعة، واشتركت فى كده يعنى.
فى خلال المكالمة، آخد الميل، طبعا أكتبه عندى فى البيانات، وأبعت السى فى بتاعتى على طول، نسيت أقولكم لازم يكون فيه خطاب مرفق بالسى فى دا هنتكلم عليه فى طبخة لوحده، قصدى، توبيك.
نسيب الطبخة تستوى على نار هادية، وميمنعش متابعة على خفيف، ، لحد ما الطبخة تستوى، المتابعة يعنى أحاول أنشئ علاقات عامة مع بتوع الموارد البشرية.
بالهنا والشفا.