"الثورجى والآخر" قصيدة لمحمد عمر

م المستحيل هتكون أنا
بنَّا أكيد فارق كبير
كنت انت مش عايش هنا
و انا كنت واعى حاجات كتير
إنت تبص لمصلحة
وانا كنت ابص على الفقير
على ناس و قاعدة فى الخلا
ع الارض مش لاقية الحصير
و ناس بتحرق فى الفلوس
و تدوس على الفرشة الحرير
كان الوطن غابة شيطان
و ديابة معدومة الضمير
*************
كنت انت خايف همستك
و انا صوتى كان زى الزئير
صوتى بيعلى بالفدا
وانت بيعلى بالشخير
طول عمرى بهتف للوطن
و انت بتهتف للوزير
حريتى كَت قبلتى
و انت بتركع للمدير
كَت روحى حرة فى السما
و انت على روحك غفير
كنت انت للظلم السجين
و انا كنت للعدل السفير
*************
ونزلت انا رُحت الميدان
وانت ممدد ع السرير
قلت الرصاصة و لا الهوان
خُفت انت و لجبنك أسير
ونجحت و قلبت النظام
وانت بتتفرج أمير
لكن ما قلتش إبعدوه
ليه حقه فى وطننا الكبير
هنحط إيدنا ف بعضها
و هنبتدى لبُكره المسير
فى بلدنا عايشين كلنا
و أكيد بيجمعنا المصير
*************
لكن بقى شوف الغباء
اللى مطير عقلى طير
تمشى ورا بتوع النفاق
فى استفتا و انتخابات كتير
ضاحكين عليك بكلام رياء
مكشوف و باين للضرير
بس انت واخد جنبهم
و تقولى على دينى بغير !!
فاكر معاهم جنتك
مع غيرهم النار و السعير
طب هوا فين دين ربنا
فى الغش و الكدب الحقير؟
************
وانا راجع الوقتى الميدان
وأنت تقول دا كلام خطير؟
وبدمى بعدل فى الميزان
وانت تقول مجرم أجير؟
وبتتهمنى ف نيتى
مع إنى عايز كل خير ؟
وبتمدح اللى هيركبوك
ويسوقوا فيك زى البعير ؟
ويرجعوك قرن لورا
ويأكلوك تِفل الشعير؟
دلوقتى حبيت البلد
و فى السياسة بقيت خبير؟
************
الغلطة تبقى غلطتى
إنى افتكرتك وش خير
الثورة دى ما يحسهاش
إلا اللى بيها كان بشير
هوا اللى راح تصعب عليه
هوا اللى ليها يكون نصير
بس اسكت انت و النبى
و بلاش غباء و كلام كتير
مش ذنبى إنى ثورجى
ولا ذنبى إنك م الحمير
هتعيش جبان و تموت ذليل
وهعيش بطل وهموت شهير