عمالك يا مصر

مصر لمَّا فى يوم تنادى = تقول ولادى الكل رد
عايزه اشوف الرمل زرع = عايزه أشوف الشوك دا ورد
ليل نهار مصنع بينتج = أبدا ً ما اعوزش فى يوم لحد
عايزا ناس تبنى تعمر = مكن يزمَّر عرق وكد
فى العمل عزه وكرامه = حصن ضد الفقر سد
عقول وشمس معايا ونيل = شباب كتير طاقة ويد
دا المكن لو صوته نام = شعب مات حلمه تهد
نقطة عرق تدى حياه = تصنع كرامه تبنى مجد
دا العمل فرض وعباده = على بنت كانت أو ولد
دا البطاله سوس بينخر = مصدر جريمة صداع نكد
إيد بتعمل تبقى طاهرة = ليها هيبه تقول أسد
ألف بوسه فوق جبينكم = ألف شكر كمان بجد
شباب ورادى سهرانين = دا الحلم قدامنا استجد
تحيه للمكن اللى داير = واللى شمَّر حيله شد
انتوا الأمل جوانا باقى = حضن الأمان روح البلد
عزم الرجال شق الجبال = قطف الثمار زرع وحصد
أكلك بإيدك تبقى حر = دا القوة إنتاج مش عدد
نخلص عمل ننتج وندى = يبقى بكرة أحلى غد