اوعوا تنسوا

من يومين اعلنت
فى بيتى انى بقيت رئيس
ردت زوجتى عليا
قالت ياريتك تبقى زى ونيس
تبنى العيال من جديد
بالحب تبقى ودود
تزرع قدام عنيهم للآمال ورود
تبقى بطل
تكتب لهم فى اول الكراسة
وداعا ياكسل
تبقى للبناء نموذج فريد
من غير كلل
من غير ملل
من غير وجل
ومهما الغير جدف مع التيار
وكان التيار
لاقتصادنا سوس وانهيار
تجدف العكس تبقى عنيد
يبقى قلبك لحب مصر
زى طهارة قلب طفل وليد
ياريتك تبقى ونيس
تحارب الرشوة حتى لوكانت
فى ليل دميس
وتعلم الناس الثقافة
الشوارع تبقى عنوان النضافة
ياريتك تصحى فيهم حب الوطن
وترسم بالعرق انشوده
وتعلى الزغروده
فوق تروس المكن
صدقنى هتموت كل المحن
ياريتك تبقى مع الجيران جليس
وتحول كل كلامك الى فعل نفيس
وتناشد همة الشباب
من غير لوم ولا عتاب
يشمروا عن سواعدهم
يبقوا على الفساد دياب
ويبقى الامل بالاخلاص عمل
زى ربنا ماوعدنا فى كل كتاب
ياريتك تشرح مفهوم التعمير
بأبسط التعابير
حتى لو قامت القيامة
او هلت علينا منها علامة
نزرع اللى فى ادينا
حتى لو كان فسيل
ياريت تجدد زراعة الانتماء
لتراب الوطن
هيساعدك القادر رب السماء
فاكر ياحبيبى ايام زمان
سألتها قلتى ايه ؟
حبنا لبعضنا ياسلام عليه
انا سمعتك بتقولى ياحبيبى
بصراحة قلبى لها كان عطشان
زى عطشنا للامن للامان
رجعت تانى تكمل الطلبات
قالت ياريت تقوم على الصحرا
بكل الغزوات
منها يكون اكلنا من غير مسرطنات
نفسى اشوف اوضتين للعيال
أملى ليهم مش محال
ونهدم كل عشوائيات
نبنى عمارات
للسحاب ناطحات
ويبقى خير الجايات اكتر من الرايحات
ياريت نجنى صبرنا ابتسامات
***
قلتلها لغاية كدا كفاية
العصايا مش معايا
العصايا كانت معجزة موسى
كانت للكليم
معجزة من رب قدير عليم
كان فيها سحر من رب الهداية
ضرب بها البحر انشق الطريق
لانه كان للاخلاص صديق
انا كمان هكون لحبكم رفيق
هحقق البرنامج اللى انا قلته
وانتم معايا
الضمير كرباج مستنى بلا تحقيق
تعالوا افكركم بالبتول ام عيسى
الست مريم النفيسه
الطاهرة الشريفه
كانت قوتها خارت
تحت نخلة رطبها طابت
قالها هزى الجزع
الرطب عليكى
بين ايديكى تتساقط
***
بس علشان مصر اسمعونى
اذا اخطأت للخير رجعونى
واذا نامت عيونى
بالبرنامج اللى حلمت به معاكم
حاسبونى
بس خلى بالكم
انا محتاج سواعدكم
والافكار الحلوة من عقولكم
عرقنا هيكون نقطة البداية
هيكون للتصدير مرايا
هنحقق أملنا خطوة خطوة
هيكون لنا على الصعاب
سطوة والف سطوة
كمان مش هبص تانى ورايا
مش همد لبره ايدى
مش هحط همومى على الحبيبب
حفيدى
من ارضنا هيكون غداك
وغدايا
وهننسج سوا غطاك وغطايا
ووعودى هتبقى قدام عنيه
صباحى ومسايا
هحققها بيكم
تبقى لنا قمرة
تبقى للوليد شمسايا
وهكتب على باب بلدنا
ادخلوها بسلام
فيها امنكم فيها الامان
مصرنا ام الدنيا
الوان شمسها بقت حاجة تانية
انشودة اتحققت بدم ولادنا
وهكتب على الميدان
اوعوا تنسوا ثورة قامت
غيرت وجه الزمان
اوعوا تنسوا البداية
اللى كانت اول خطوة فى الحكاية
مصر عايشة
قمرها ... شمسها ... نيلها
ارادة شعبها مالهاش نهاية
***