اسمحى لى أسألك

أرسم عيونك أزاى.. مش لاقى ألوان توصف عيونك.. وارسم ملامحك أزاى؟.. أشوفها أدعى ربى يصونك.. اسمحى لى أعتذر.. مش هاقدر أتكلم.. ولا أشرح.. وأنا لسه بتعلم.. بجمع حروفى من اسمك.. والملم خيوطى من رسمك.. واختار ألوانى من ضى نورك.. واختار مكانى على شط بحورك.. واتنفس لما أشم هوى بخورك.
اسمحى لى أسألك.. هو اللى عاش بعيد عن حبك.. يبقى فعلا عاش؟!!!!.. دا لو شاف عمره من غيرك يبقى راح بلاش.. أزاى ما شافش سماره من شمسك.. أزاى هان عليه يسرق ف أرضك.. أهو جمع أموال الدنيا وما شبعش.. هو اللى أمه تغضب عليه يعيش مرتاح؟.. ما فتكرش.
فضلتى صابرة عليهم قد أيه؟.. ياه كل ده؟.. قد كدة كنتى بتحبيهم وهمه مش حاسين؟.. مستنية بشوق تلاقيهم جايين.. يعوضوكى عن اللى شوفتيه من الأغراب.. فاكرك وأنتى بتحوطى عليهم وبتقفلى كل باب.. وتقولى دول ولادى اللى ها يحمونى من العذاب.. بدلو عمارك خراب.. ما عملوش لحبك حساب.. ولو أملك فيهم خاب.. وقت الجد ليكِ رجال.. ما هو مالك أصلاً حلال.. تشم فيه عرق الفلاحين.. وعمال المصانع سهرانين.. وشباب شداد واعيين.. وقد الجد يتجمعوا ما تعرفيش جم منين.
حاسك يا أمى لسه حزينة.. بتفكرينى بالحكاية.. وتقولى حاسب وخد بالك من نفسك.. وافهم أصل الرواية ومش أى حاجة تصدق.. واشتغل بقى كفاية نفسى أطمن عليك.. أشوف راسك عالية والخير بين إديك.. ولو فيه خير راح.. أنا خيرى لسه براح.. يابنى أنا قبلك كنت ليل وبشغلك هايكون الصباح.