كريم العنصرين

قالوا ف غفله ..
بحيرى أخينا ولا صعيدى
قلت ف صحوه....
ودم بيغلى جوا وريدى
تبر محنى كف شهيدي..
بحّر..قبّل..شرّق ..غرّب
يوم العزه فرحى وعيدي
قالوا لقُفه..قول لنا نكته..
قال ف سذاجه مره صعيدي
قلت دا سقطه..
جدى الخامس إسمه هريدي
جارى وعمى صاحبى أخويا
جاى من طنطا..اصله بحيري
رد بحرقه السيد دى دي
إحنا بنضحك ..مالك قافش
إبسط عادى ..!!
قلت يا قُفه..
إوع تسب ف جدى وسيدي
أصلك ناسى إسم جنابك
سيد دى دي..!!
إياك تغلط ..ولاّ تغالط
لسه العِصمه ماسكها ف إيدي
أصل انا مصرى غصباً عنك
واسمى ونقبى عمّ هريدي
تطلع.. تنزل..مهما تهلل ولاّ تعلل
انا مش قفل ولاّ معلق حبل ف جيدي
إنت غشيم ..؟ أظن بهيم !!
لما تشوه إسم وصوره شعب عظيم
لمّا تثرثر ولاّ تشوه رمز العزه والتعليم
فعلك أصله فعل لئيم
ولاّ عتاوله كان لها باع
ف المدنيه والتنظيم
شالوا القصعه ويا المِدره
لما جنابك كنت غشيم
رسموا وعلوا ف البنيان
زرعوا الغله بالفدان
عبدوا وشكروا رب حليم
وانت جنابك طالب فاشل ف التعليم
تسمع نكته..؟
كان فيه مره شاب لئيم..!!
ولاّ ببلاش أحسن تزعل
أصل انا جاى من نبت كريم
سوا من سينا أو مطروح
جاى م النوبه أو بلطيم
هافضل مصرى أصلى كريم
مهما صرح ولا هجاني
شاب مغفل فِكره عقيم..