ليلة منام "سِدنا" النبى

ليلة منام سِدنا النبى
شفت الشجرْ
وسمعت غنوة من لسان عصفورْ
وكأن نجمه فى السما
بين الفلك بتدورْ
لمسة حنان عدِّت هنا
ولا فيش ملاك ولا حورْ
شايف بباب الخلق
حاجة بتتولد
بينها وبين الخلق سورْ
يا أهل المنام
سايق عليكم فرحتى
إيه الحكاية أنا شفت نور
طب يعنى أيه
النجمة هاربة فى السما
تفسيره إيه
الغنوة والعصفور
أمى الحبيبة تقول لِى قوووووووووول
وأنا قلبى يحكى فرحتى
تشهد ملامح جدتى
وتقول لى مش معقول
افرح يا واد
د النور ده هُوْ
سِدنا الرسولْ
لو كنت حاسس
فى الزمان ده بأى ضيقْ
تايه وبتعدى البحار
عايش غريقْ
دوّر على سيرة النبى
وافتح كتاب اسمه (الرحيق)
هتلاقى معنى للحياة
كل الهموم بتزولْ
...................
لِيلةْ منام سِدنا النبى
قلبى اللى بيرفرف عليك
ويحن ليك
أمى الحبيبة
تقول لِى أوعى تسيب يا واد
سنةْ نبيكْ
فرحانة بيكْ
تفتح كتاب سِدنا النبى
صلت عليكْ
يا سلام على سيرة النبى
كان عمرى يوم ما عرفته
واتربيت عليه أربع سنينْ
جارنا اللى وصّانا النبى
نحسن إليهْ
لو غاب ندق الباب
ونطّمن عليهْ
لو حتى مين.....
كان عمرى قال اربع سنين
وعرفت أنا حق الطريقْ
ولا عمرى خنت ف يوم صديقْ
سِدنا النبى علمنى
أحب الطيبين
علمنى كيف القلب يصفى
والصحاب متجمعين
علمنا لو جانا الغضب
نحبس غضبْ
مهما اللى كان
لازم نلين
كان عمرى قال أربع سنين
جارنا اللى ساكن
جنب بيتنا "بنيامين"
وأمى الحبيبة تقول يا واد
سلِّمْ عليهْ
لو شفته مره فى الصباحْ
صبّح عليهْ
لأجل النبى
لازم تكون للجار أمين
......... .....
من كام سنة
رسموا النبى
إلا النبى يا أهل الكتابْ
وحْياةْ كتاب الله
تهون النفس
ويهون العذابْ
لأجل النبى ترخص حياتنا
والشيوخ قبل الشبابْ
مين اللى قال
وصّى على أهل الكتاب
غير النبى
يا أهل الكتابْ
دانا نفسى أشوفه
واعتذر لُه
مره تانية فى المنامْ
وأنا غصب عنى
بين بحور الشعر
بغرق فى الملامْ
كان عمرى قال
تلاتين سنة
ولا عندى غضبة بتنتفض
غير الكلام!!!!!!
كلمه وقالتها جدتي
لحمك ودمك يا ولد
سنة نبيكْ
واوعاك تسيب حق النبى
ويهون عليكْ
دانت اللى شفته فى المنام
دلوقت واقف بعتذر
غضبى كلام
أسفى كلام
أصل الحكاية
الصمت وأكل غضبته
والشعر برضه
كان كلام فى كلام