قصائد :رجب الصاوي

وشوش كل الوشوش اختفت
مع العصافير..
كل الوشوش بتطير
وش الحبيبة..
ووش أمي الطيبة
ووش أصحابي
وشوش من غير إيدين
من غير عنين..
وماحدش فيهم
بيخبط علي بابي
وأنا قاعد بستنظر
يمكن واحد فيهم يتذكر
كل الوشوش اختفت
فجأة اختفت
ماباقيتشي فاكر منها غير ضحكتين
ودمعتين..
وكلمتين..
وذكري غيمانة في قلبي الحزين
كل الوشوش اختفت
لكني مش عارف..
اختفت فين!
حاسس بالخطر
قلوب كتير ماشية تدور
عن حاجة جديدة..
عن معني جديد..
عن إحساس واضح ومنور
إحساس أخضر..
وبيتمنوا يعيشوا
ف دنيا جميلة
العقل فيها بيتغير..
والإنسانية بتتطور
والعدل بيكبر ويزهر
لكنها..
بتلاقي قلوب تانية
زي الحجر..
بتقول علي الدنيادي فانية
وتمللي بتهين البشر
ومعاها الدنيا بتتدهور
وبتتأخر..
ومابين القلوب ديه
والقلوب ديه..
باحس دايما بالخطر
إحساس خايب
ماشي بإحساس خايب
عارف إني ماليش نايب
وماليش أصحاب..
ومافيش في حياتي حبايب
ماشي بإحساس دايب
وبقي لي سنين عطشان
وسنين حيران..
مش قادر اعشش في جناحك
ولا قادر علي كتر الأحزان
ضميني من تاني
أرجوكي..
ضميني من تاني
يمكن الصوت الضعيف اللي فيا
ينفجر.. ويبان.
غنا أخير
سامحوني يا أصحابي..
وياريت ترجعوا من تاني
وتخبطوا بايديكم علي بابي
نسهر زي زمان للفجر
نحكي ف حواديت العشاق
ونغني لكل التعساء
وف آخر السهرة نعيط
ونقول ده أجمل بكاء
سامحوني يا اصحابي..
أنا حاسس إني خلاص
مش حاقدر أغني..
واللي أخدكم من حضن الليل
هوه اللي أخدني
وبعدنا بعيد عن بعض
لا بقينا فوق في السما
ولا لمسنا الأرض
سامحوني يا أصحابي
لا حانقدر من تاني نغني
ولا ممكن نتقابل..
علشان ماباقاش في ايدينا سلاح
زي اللي ف إيد القاتل
وما عادشي فاضل..
غير جراح ميتة
وهموم.. ومشاكل.