سلف ودين

يا مصر قدامك نفق
بنعدى فيه
بنشوف حاجات
حملك تقيل
والليل طويل
حابس عشانك ذكريات
عايزين نعيش بره النفق
وندوس على الجرح اللى فات
عمرى اللى فات
البحر كان بيلمنى
والموجة عالية من زمان
والحلم مات
يا مصر قدامك يا غالية
مزلقان
هنعدى إمته يا وطن؟
ما تقولى إمته نعيش أمان؟
برك بعيد
كل البلاد ترسم وطن
وانت اللى بتدور مكان
خمسين سنة
ما قادرش أوفر لقمتى
ضهرى اتحنى
شيلت العيال لفيت بلاد
يشهد طابور العيش
وسور المزلقان
فكرت أسافر يا وطن
فاضل يومين
ختم الخروج شاهد على
دموع العينين
طيارة واخده الحلم
تانى لحد فين؟
طيارة بتلم الحاجات
ألبوم صور
شنطة سفر
حلم السنين
ختم الخروج
وانا كنت حاضنك يا وطن
ماسك حدودك بالإيدين
بتقولى روح
خمسين سنة
بتغطى جسمى بالجروح
قضيت حياتى سلف ودين