النور مقطوع

مش كام مره ف الشهر ولا كام مره ف الأسبوع
دى بقت عاده يوماتى ف بيتى النور مقطوع
مابقتش طايق نفسى وغصب عنى بقيت رومانسى
وكل حته ف بيتى مولع فيها شموع
ف يوم بتعشى ف البيت لا بيّا ولا عليّا
وفجأه كإنى إتعميت إسودت الدنيا حواليّا
أتارى النور إتقطع عندى وعلى الرغم إنى عايش لوحدى
كنت حاسس إن فى حد قاعد على رجليّا
وقفت طبعاً كل الأجهزه ووقف معاهم التكييف
قولت خلاص بناقصها غذا وقعدت أهوى بالرغيف
وروحت قايم متسحب وأنا ماشى ف رجلى بسحب
وقولت أدخل أوضتى أنام مره خفيف
عديت من باب الأوضه وأول ما وصلت السرير
سمعت ( يا وقعه سوده) وبسرعه ناس كتير
إتلموا حواليّا ونزلوا ضرب فيّا
أتارينى بالغلط دخلت شقة جارنا سمير
قالولى بتعمل إيه هنا يا قليل الأدب
قولتلهم سامحونى الدنيا ضلمه وع النظر العتب
قاموا سامحونى جيرانى وقالولى ماتعملهاش تانى
ولما رجعت شقتى لقيت فيها ناس مالهاش عدد