كرسى الرئيس

قولوا لمعالى الرئيس يجيب له كرسى حديد
ناشف وضهره خشب ومش مريح للأيد
وقعدته مش بتلزق وشكله مايسليش
واللى يشوفه يفارقه ويتنقل لبعيد
......
وبلاش كراسى القصور علشان دهبها جميل
مُغرى كمان للعنين والقلب له بيميل
علشان كده اللى بيقعد مره واحده عليه
يتمنى يقعد عليه طول النهار والليل
......
بيقولوا كرسى الرياسه جميل اوى وخطير
وضهره فيه اجنحه وعند اللزوم بيطير
والمال بيجرى اليه من غير ما ينده عليه
وتلاقى المعجبين واقفين عليه طوابير
......
نصيحه منى بلاش قاعده على الكرسى
احسن مشاكله كتير وانا خايف على ( مرسى )
ولو انى واثق فى شرفه وذهده وقناعته
ولسانه دايما يرتل اية الكرسى
......
قولوا لمعالى الرئيس اوعى تكون زعلان
انا قصدى بس انصحك احسن تكون غفلان
وعشان بحبك كتير خايف يا صاحبى عليك
مش عايز اشوفك نزيل السجن زى فلان
......
والكرسى لو كان دهب وياقوت يا صاحبى يغور
والتاج اذا ذلنى هارميه واجيب طرطور
القرب من ربنا يغنى عن السلطان
واللى يقول غير كده يبقى اكيد مغرور
......