من مواطن إلى سيادة الرئيس" 2"

أول ما تنوى تقعد على كرسى المريسه
أرجوك تبقى تعاملنى بطريقه كويسه
وفوتلى حته جنبك عشان أفضل أحبك
أصل الاخ اللى قبلك عاملنى بغطرسه
...
ولما تروح تصيف بلاش شرم ومارينا
لا تنسى كفر ضفدع وتتكبر علينا
أصل الاخ اللى قبلك كان من كفر المصيلحه
نسى أهله ونساها وإدى ضهره لينا
...
ولما تعوز تشتى إقعد فى الشمس حبه
دا شمس مصر أحلى من الشمس فى أوروبا
وإتغطى ببطانيه يعنى أغلى شويه
زى اللى أخويا جبها من ليبيا جوه علبه
...
ولما تعوز رغيف من العيش النضيف
أنا عارف فرن جنبى صحبه راجل لطيف
بيسوى العيش كويس وإيش حال لو كان لريس
طبعا هيبقى أجمل وكمان شكله ظريف
وكمان وحياة أبوك بلاش زفه ومواكب
الالاضيش الكتير بيوقفوا المراكب
وبلاش (زكريا عزمى) اللى معكرلى دمى
وصفوت الشريف كان فوق الشعب راكب
...
وكمان وحياة أبوك ريحنا من عيالك
وحرمك المصون هنشلها فى العيون
بس اوعى تسيبها تحكم أو تتريس بدالك
...
مش عايز حاجه منك غير تحفظ الامانه
وإوعى تفكر إنك رئيس ومعاك حصانه
هنطلع الميدان وندعى عليك كمان
زى ماشيلنا زمان مبارك والبطانه
...