عيشه غش فى غش

بقلم : الشاعر زغلول الطواب
أنا واد خفيف الدم
عمرى ما أشيلها هم
روش ومروش
إبن نكته وبحب الضحك
وكل ما تشوفنى
تلاقينى مفرفش
عمرى ما حبيت النكد
ولا هويت الزعل
ولا يعجبنى الوش
إللى كله تجاعيد ومكرمش
ولا عمرى شربت سجاره
ولا قعدت على قهوه
ف حاره
ولا عمرى كنت بشيش
يعنى بإختصار كده
أنا واد حبوب
ودايماً مفرفش
ولا عمرى حبيت التقسيط
ولا أحب أتعامل مع واحد أليط
ولما أحب أشترى حاجه
دايماً تلاقينى بكيش
وعايش تمام التمام
أنام مرتاح البال
زى الطير لما يعشش
ولما فكرت أتجوز
كان لابد أدور كويس
أصل بنات اليومين دول
بتحب تهيس
وتوشوش وتفتش وتفرفش
عيشاها بالطول والعرض
ولو مفيش كرسى
عادى تقعد على الأرض
بلاش تعقيد وبلاش غلب
وممكن تقابلك فى أى مكان
من غير خوف ولا حسبان
ومفيش مانع
على كافيتريا تشيش
ولما تروح
تلاقى أبوها مفلس
وتلاقيها طول الليل سهرانه
على النت تشات وتهيص
قال أيه بتذاكر
والبيت عارف ومطنش
الحقيقه بقيت ف حيره
كل يوم مفيش
غير دى السيره
إمتى يا منيل هتتجوز
يا خوانا أدينى بدور وبدعبس
هو عريان سنه
إشتكى الخياط على يوم
ولا أنا كل يوم هتجوز
الجواز محتاج تخطيط
وتفكير وتريس
خالتى بنتها أموره
وعمتى جيبالى ميت صوره
وأمى ف الرايحه والجايه
عماله تفتش
ولما آن الآوان
وكان حظى كويس
قابلت بنت الجيران
حاجه كده تهوس
جميله وأموره
ومن النوع
إللى بيحب يفرفش
من عيله عال العال
وأبوها شغال ريس
بس يا خساره
ولا بتعرف تطبخ ولا تكنس
ولا تعرف ترتب ولا تفرش
هى كده متعلمتش من أمها
يعنى أيه لما هتكبر
هيجيها يوم وتتجوز
طول عمرها
من البيت للجامعه
ومن الجامعه للنادى
والشله إللى ملهاش ريس
شاكى وهادى
وفادى وباكى
ونانى وهانى
شله بتحب تفرفش
الفطار مصاصه
والغدا شيكولاته
والعاشه بسكوت وزبادى
أصلهم مالهمش فى الطبخ
بيسموه حاجه كده نفخ
والشعر كانيش
واللبس مفيش
وكلام كدب وغش
لزوم الوجاهه يا ريس
أغانى سريعه
وعيشه رفيعه
تخلى الواحد يبعد ويكش
لكن هو كده
ومفيش غير كده
عاجبك ولا تعنس
بينى وبينكم
قعدت بينى وبين نفسى
أحسبها كويس
وأيه يعنى لما أتجوز
أموره وشحروره
وبتحب تفرفش
وأعيش معاها بميت وش
بصراحه البنت ما تتسابش
وأيه يعنى متعرفش
أنا بحب البنت وبس
ولبسها ف البادى والجينز
وبحب الشعر السايح
إللى نازل على العين والرمش
وبموت ف البنت الهاى
إللى بسرعه تقول باى
ولا تنكسيفش
بهوى البنت العصريه
ولدغتها ف الإنجليزيه
ماهى كله دلوقتى
غش ف غش
بصراحه الجوازه
كانت سهله مقولكش
ولا مأزون ولا داويلو
ولا عقد عليه دمغه
ولا مهر ولا مآخر
ولا عفش
قولتلها معقوله
كده بسرعه
الجوازه كده سله
قالتلى يا عم كبر
وماله الجواز العرفى
وليه مينفعش
قولتلها ينفع ياختى
ماهى دى آخرة بختى
أصوم أصوم
وأفطر ع جوازه مش شرعى
ماهو كله دلوقتى
بيعدى
ومفيش داعى من القفش
وكله بيضحك على كله
والعيشه غش ف غش