مدحت العدل ل معكم: أم كلثوم تجربة سينما على المسرح وقصيدة صوت الست كانت البداية

قال المنتج والسيناريست مدحت العدل، إنه قرر تقديم عمل مسرحي عن أم كلثوم بعد أن كتب قصيدة بعنوان "صوت الست"، موضحًا أنه شعر بعدها أن المشروع هو قدر فني لا بد أن يحققه هذا العام، قائلا: "كتبت القصيدة، اللي هي (صوت الست) أنا كتبتها وحسيت إني مش هعمل غير ده، ولازم تتعمل السنة دي عشان مرور 50 سنة."
وأوضح العدل في لقائه مع الإعلامية منى الشاذلي ببرنامج "معكم" الذي يذاع عبر قناة ON، أنه كان يحمل تصورًا محددًا أثناء كتابة النص، يقوم على المزج بين تقنيات السينما وروح المسرح، قائلًا: "أنا كاتب المسرحية في ذهني أشياء معينة، وكنت عايز أعملها سينما على المسرح. يعني ده الأسلوب اللي جه في دماغي وأنا بكتب."
وذكر مدحت العدل، أنه أراد من خلال التجربة أن يخاطب الأجيال الجديدة ويعيدها إلى أجواء زمن أم كلثوم بكل تفاصيله، مضيفًا: "كانت يعنيني إنها توصل للشباب الصغيرين، أنا مش عايز أقدم أغاني لأم كلثوم ساعة، أنا عايز أقدم تجربة لأسرة مصرية تروح من أول ما تخش من الباب تحس إنها رجعت 70 أو 80 سنة ورا."
ونوه العدل إلى أن المسرحية ليست مجرد عرض غنائي بل تجربة تفاعلية متكاملة، قائلاً: "أنتِ بتخشي حالة تلات أربع ساعات، إحنا حاولنا نعمل التجربة دي، فالعرض مش مجرد مسرحية، ده عالم كامل داخل القاعة وخارجها وما بعدها."
وأكد أنه حرص على أن تكون أسعار التذاكر مناسبة لكل الفئات، لافتًا إلى خطته لتقديم العمل في مختلف المحافظات، وقال: "أسعار التذاكر نص أسعار تشارلي شابلن، كنت مُصر إن أي مصري أو أسرة عادية تقدر تخش، وأنا هلف بيها الأقاليم كلها. أم كلثوم مش بتاعتي، دي بتاعت الشعب، أم كلثوم صوت الشعب."
ولفت قائلًا: "بعد ما قفلنا الستارة، كله انهار في العياط، لأن التوتر كان كبير جدًا، وأنا بشتغل ببقى دقيق ومهذب، بس عصبي بشكل غير طبيعي، وده يمكن سر الشغف اللي بيبان في النتيجة".