إسلام ابراهيم عن مسرحية «شارلي شابلن»: «فخور أن عندنا مسرح خاص بيقدم النوع ده من العروض»

أشاد الفنان إسلام إبراهيم بمسرحية «شارلي شابلن»، التي نالت إعجاب عدد كبير من الجماهير والمتخصصين في الوسط الفني، مؤكدين أنهم فخورون بوجود مسرح خاص يقدم هذا النوع من العروض.
وكتب إسلام إبراهيم، عبر حسابه الرسمي بموقع التواصل الاجتماعى «فيس بوك»، قائلا: «امبارح حضرت عرض شارلي شابلن والحقيقة مش عارف اقول ايه بس هتكلم عن احساسي وانا خارج من العرض كنت فخور اوي أن عندنا مسرح خاص بيقدم النوع ده من العروض تجربة بصرية وسمعية قمة المتعة فخور أن عندنا فنانين في كل المجالات قدروا يطلعوا عرض بالدقة والجودة دي من تمثيل لغناء لاستعراض لألحان لإضاءة لهندسة صوت لملابس لديكور لإداراة ممثلين وده طبعا تحت قيادة مخرج عظيم وموهوب ومبهر ومثقف زي أستاذ احمد البوهي بمجرد ما توفرتله الإمكانيات قدر يستغلها أحسن استغلال».
وأضاف: «واللي زود فرحتي أن الصالة ما شاء الله كومبليت فمحدش يقول الجمهور عايز كده الجمهور عايز فن حقيقي، جرأة كبيرة من الشركة المنتجة تستحق الاحترام والتقدير لناس عايزين يقدموا فن حقيقي مشرف، محمد فهيم مش هقدر أقول حاجة عنه غير أن محدش يقدر يعمل الدور غيره مفيش بديل في مصر موجود يقدر يقدم الدور بنفس الجودة وخصوصا الأداء الحركي والاستعراضي لشارلي شابلن».
وتابع: «نور قدري مشروع فنانة شاملة مكتمل العناصر تمثيل غناء استعراض كوميدي تراجيدي صوت رائع وإحساس يخطفك كل حاجة تلاقي يا فندم، داليا الجندي، حضور طاغي ومبهر وأداء مثقف، عماد اسماعيل كالعادة المسرح ملعبه وشهادتي فيه مجروحة، دكتور ايمن الشيوي هو فعلا استاذ تمثيل، ريم العدل كالعادة مبهرة ودقيقة وبطلة رئيسية في أي عمل بتدخله أي عمل عليه اسم ريم العدل لازم تنبهر».
واختتم حديثه قائلا: «دكتور مدحت العدل أرجوك متبطلش كتابة أو بمعنى أصح، متبطلش تعملنا مشاريع قيمة زي دي، باتريك انت فنان حقيقي ومسرحجي مهم، عرض زي ده في توقيت زي ده ليه معاني كتير أوي جميلة ونبيلة أنا فرحان أوي».
أبطال مسرحية «تشارلي»
المسرحية بطولة كل من محمد فهيم، نور قدري، أيمن الشيوي، داليا الجندي، وعماد إسماعيل، ومن إنتاج شركة «سي سينما برودشكنز» هاني نجيب وأحمد فهمي، بالإضافة إلى خمسين فنانا آخرين من الممثلين الشباب والراقصين، تلحين ل إيهاب عبدالواحد، والتوزيع ل نادر حمدي، وتصميم الاستعراضات عمرو باتريك، ملابس ريم العدل، ديكور حازم شيل، إكسسوارات دكتور محمد سعد ومن تأليف مدحت العدل وإخراج أحمد البوهي.