الرئيس السيسى خلال لقائه بأهالى مطروح: هنتجاوز التحدى الاقتصادى وهيتحول لماضى زى الإرهاب.. نقدم التعويض المناسب للمواطن عن الأرض أو البيت وده مبدأ.. الدولة تخطط لزراعة 700 ألف فدان جديدة فى المنطقة الغربية

أكد الرئيس عبد الفتاح السيسي، أن الدولة استطاعت حل مشكلة المياه التي كانت تعاني منها محافظة مطروح منذ 7 سنوات، موضحا: "من 7 سنين كانت فيها مشكلة مياه.. وفرنا مياه شرب لمطروح وفق خطة لتحلية المياه وتوفيرها للمدن الساحلية على البحر المتوسط.. برنامج محطات لتحلية مياه البحر ودي اللى هتوصل لأهالينا في المدن دي".

وأضاف الرئيس السيسي، خلال كلمته في لقاء مع أهالي مطروح: "المطالب كتير لأن احنا متأخرين كتير.. ويمكن اللى بنقول بنشتغل على كامل الدولة قصدت بيها إننا محتاجين نعمل كتير اوي.. مش طريق بس ومش مدرسة بس.. طريق ومدرسة وقطار وحاجات تانية كتير.. بنتكلم في 105 ملايين.. اشتغلنا بهمة وعلى طول.. وأثناء كورونا كنا شغالين.. ودلوقتي شغالين وهنفضل شغالين كده".

وتابع الرئيس السيسي: "التحدي الاقتصادي اللى أنا شايفه، والحكومة واحنا كلنا هنقدر نتجاوز المرحلة دي ويبقي تاريخ.. وهيبقي تاريخ زي الإرهاب وهتبقي تاريخ بفضل الله سبحانه وتعالي والظرف الاقتصادي الصعب دا هيبقي تاريخ إن شاء الله... وننفذ شبكة طرق متكاملة في كل محافظة مطروح".
وقال الرئيس عبد الفتاح السيسي، إن الدولة المصرية تتعامل بشكل واضح مع أي تعويض للمواطنين، بحيث أنه لا يتعرض أي مواطن للظلم، متابعا: "فيه مبدأ للدولة أنه مفيش حد يتظلم أو يتاذي من أي إجراء للدولة.. وده مبدأ عام.. لأن المواطن ابن مصر.. الكلام دائما لو فيه حركة هتمس المواطن أو أسرته.. لازم يتعوض الأرض والبيت والزرع.. وده مبدأ عام للدولة".

وأضاف الرئيس السيسي، خلال كلمته في لقاء مع أهالي محافظة مطروح: "مش بس على قد التنمية أو التعويض.. التعويض جزء من الموضوع.. فيه شكل تاني من الحياة جاي.. زي تأثير العلمين.. وتخيل لما الضبعة تخلص خالص ونفتتح أول جزء فيها.. هو النهاردة مش المكان ده فيه ناس بتشتغل فيه وعاملين مدرسة .. كل مشروع زي الميناء وهيكون له انعكاس لأهلينا والمنطقة الملاصقة للميناء.. كل حاجة بتتعمل لها تأثير إيجابي علينا.. يمكن يكون بطئ ومش هتشوفوا بسرعة.. والقطار لما يجي؟!.. المنفذ بتاع السلوم ده بقالنا 4 سنين شغالين فيه.. علشان يخلي القدرة والشكل الحضاري مع الأشقاء في ليبيا يليق بالعمل.. تجار مطروح وبراني والحمام اللى بيشتغلوا وسوق كبير.. انا عشت هنا سنين وشايف ده.. واللى بنعمله حاجة تانية خالص.. احنا فيه قدرة على النمو.. والمشروعات بتاخد وقت".
وأكد الرئيس عبد الفتاح السيسي، أن موضوع المياه للزراعة واستصلاح الأراضي مهم جدا، متابعا: "موضوع المياه موضوع مهم وانا بتعامل معاكم ومش بتكلم إلا بالصدق.. لو فيه فرصة اخلي الترعة ترعتين و3 وأقدر أوصل المياه من شرق مصر إلى أى حتة.. تفتكروا بفضل الله فيه حاجة توقفني.. هتشوفوا خلال شهور قليلة جدا افتتاح الدلتا الجديدة.. طب الدلتا الجديدة دي مش متاحة ليكم.. ولكل مصري.. احنا عملنا الجهد الكبير والأرض متوفرة.. بتتكلم عن 2 مليون فدان".
وأكد الرئيس عبد الفتاح السيسي، أن الدولة المصرية تخطط لزراعة 700 ألف فدان جديدة في المنطقة الغربية، ولم يتم الإعلان عنها حتى الانتهاء من كافة التفاصيل، متابعا: "فيه 700 ألف فدان ما أعلناش عنهم خالص.. بيتعمل 200 كيلو علشان نوصل لحد هناك.. وهنشوف فيه مياه تكفي لزراعة الكمية دي ولالا.. ولو فيه هنزرعها".

وأضاف الرئيس السيسي، خلال كلمته في لقاء مع أهالي محافظة مطروح: "توصيل المياه لغاية سيدي عبد الرحمن أو الضبعة.. طالما عندي الفرصة هوصل المياه.. ولو مفيش مياه أكد مش هوصل.. حجم المياه اللى متاح ليا على قد زمام منطقة الزراعة في المنطقة المحيطة على سبيل المثال.. احنا عاملين ترع فوق 80 و100 كيلو.. ترع ضخمة ومسطحة.. مش عندي مشكلة لو فيه مياه.. سيوه عندها فرصة كويسة علشان عندها مياه جوفية علشان ننظم المياه بشكل علمي".

وتابع الرئيس السيسي: "اللى حصل اننا كمواطنين كان المواطن عنده حتة أرض راح نازل على الطبقة السطحية وبدون علم ومعرفشي وطلعت المياه المالحة عليه.. بورت الأرض وضيعت الشجر والزرع.. وعلشان نحل المسألة الموضوع اتكلف 2.7 مليار.. اتقال من 20 -25 سنة لما اتطرح الموضوع ده هو هنصرف مليارات على 4 آلاف أسرة.. قال ننقل الناس بتوع سيوة في حتة تانية ونوفر المبلغ ده واحنا مش عملنا كده.. المبدأ العام للدولة اننا مش نقدر نجور على حقك ولا حق أي مواطن.. واحنا بندور على المصلحة.. والمصلحة بتصب في صالح المواطن في النهاية".
وأكد الرئيس عبد الفتاح السيسى، أن التنمية تحتاج إلى سنوات والدولة المصرية تواصل العمل المستمر إلى الأمام من أجل البناء والتنمية، متابعا: "فى ناس بتقولك خدتوا الأرض وخدنا فلوس.. واحنا مكانش عاوزين نسبها.. بس عاوز أقول أن النقل والتعويض لمصلحة أكبر.. مثال "مينا جرجوب".. ممكن يكون فيه بعض التجمعات البسيطة موجودة.. يتم الترضية بشكل كامل ويتم الترضية على المنطقة كلها.. ومثال آخر القطار السريع بمليارات الدولارات علشان ينقل كل المصريين ويسهل الحركة ويدعم العمران فى المنقطة كلها وده مش بيتحقق فى يوم وليلة.. الناس في مصر بتقول هانشوف امتى؟".
وأضاف الرئيس السيسي، خلال كلمته فى لقاء مع أهالى محافظة مطروح: "التنمية بتاخد سنين طويلة.. طب السؤال احنا واقفين ولا ماشيين.. وماشيين لقدام.. بفضل الله ماشيين لقدام قوى.. واللى ببيتعمل في مصر بفضل كبير.. وموضوع المياه حساس قوى لأن مش عندنا مياه كتير.. وأقدر أوصلك المياه.. لو فيه مياه".