أكد الرئيس عبد الفتاح السيسى، أن تدشين المساحات الخضراء فى المدن الجديدة تأتى فى إطار حرص الدولة على الاستفادة من مياه الصرف الصحى بعد معاجلتها، وعدم هدرها فى أى مكان دون فائدة. وأضاف "السيسى"، فى كلمته خلال افتتاح المرحلة الأولى من مشروعات العاصمة الإدارية الجديدة اليوم، الأربعاء، "إحنا بنستفيد من مياه الصرف الصحى وعاملين برنامج ضخم عشان نوصل لمليارات الأمتار من المياه لمعالجتها واستخدامها، ومن ضمن الاستخدامات المناطق الخضراء". وأوضح الرئيس السيسى أن التخطيط المميز يشمل المدن الجديدة كلها، وليس العاصمة الإدارية فقط، مضيفا: "كل المدن الجديدة جيل جديد من المدن، تتحقق فيها كل المطالب بحجم أقل، ولكن المستوى واحد". وعلق الرئيس عبد الفتاح السيسى على المؤشرات الإيجابية التى يحققها الاقتصاد قائلًا: "لسه بدرى قوى، إحنا لسه فى أول خطوة لبناء دولة حديثة، تحترم نفسها وتُحترم من الدنيا كلها، وهذا الكلام لا يتحقق بالعافية، ولكن يتحقق بالجهد والعمل والتخطيط وتنفيذ الخطط". وتابع الرئيس السيسى: "هو إحنا مش حقنا نحلم ولا إيه؟ هو عيب علينا إن يبقى عندنا 13 مدينة زى العاصمة الإدارية؟ هو خسارة فينا ولا إيه؟ لما حد يتكلم يقولك الأولويات، ولكن كل الأولويات مطلوبة، ما أقدرش أسيب حاجة واشتغل فى حاجة تانية". أكد أن الحكومة تخطط مدنا جديدة تليق بمصر وأهلها الذين يقطنون فى أماكن صعبة، قائلا: "إحنا بنعمل أماكن تليق بمصر وأهلها، وبنعمل أمر التاريخ هيقف أمامه كثيرا، ويشوف إحنا عملنا إيه لأهلنا، مش بس فى القاهرة ولكن فى المناطق المختلفة". وأوضح الرئيس السيسى، أن الهدف من العمل هو استدامة النمو، خاصة أن عدد سكان مصر تخطى 100 مليون مواطن، متابعًا: "لو وقفت عن النمو فالنمو العشوائى هيسبق الدولة ويعمل مشاكل ضخمة فى البنية الأساسية الخاصة بالصرف والطرق ومياه الشرب والكهرباء". وتابع السيسى كلمته قائلا: "الحكومة فى حال توقف استدامة النمو ستعكف فقط على حل المشاكل"، مؤكدا أن الجيل الجديد من المدن يسعى لاستدامة النمو الذى يتناسب مع حجم نمو مصر السكانى، لافتا إلى أن أولويات الحكومة تشمل كل شىء و"البلد ينبض بالحياة ولازم أولوياتنا كلها تنبض بالحياة وتتحرك بمعدلات جيدة". وأردف السيسى قائلا " إن استدامة معدل النمو الاقتصادى تعنى عدم التأخر فى هذه الاستدامة، وأن أى تأخر سيسبب مشكلة، متابعا: "بقالنا 7 سنين ما كناش بنتحرك بالشكل المناسب، علاوة على إن كان عندنا تأخير فى السنين اللى فاتت". ووجه الرئيس السيسى، فى حديثه للمصريين قائلا: "عايز أقول لكل المصريين، هل اللى إحنا بنعمله ده كان على حساب حركة الحكومة فى كل الأولويات والمشروعات الأخرى؟ لأ طبعا، أنا هبقى سعيد بأى نقد مدرك وفاهم وعارف، هو حد عاوز يتكلم عن مصر وميزانيتها ل100 مليون مواطن و100 ألف موضوع، والابن اللى قاعد فى البيت مش عارف أبوه بيجيب الفلوس منين ويصرف عليه إزاى؟". وعلق الرئيس السيسى على الانتقادات بشأن المشروعات القومية التى تنشأها الحكومة، قائلا: "ده بيقلل جدا من الجهد اللى بيتعمل، وهيدّى انطباع غير جيد، وكأن الدولة مش عارفة بتعمل إيه، ومستنيين حد يقول لنا خلّوا بالكم من الموضوع ده، ومستعد أسمع بس اللى يكلمنى يبقى فاهم وعارف كويس، وارتباط الموضوع اللى بيتكلم فيه والموضوعات الأخرى، لأنها شبكة مترابطة مع بعضها وكل موضوع يؤثر فى الآخر". واختتم الرئيس عبد الفتاح السيسى حديثه فى هذه النقطة قائلا: "بفضل الله بنعمل دولة ذات شأن، وهتشوفوا، وبعد سنين مش كتير هيبقى فيه ناس تقول يااااااه، قد كده كان كل ده بيتخطط ويتنفذ علشان تبقى بلدنا بالمستوى ده، شكلا ومضمونا".