أَولْ عِيدْ!

حسب التواريخ
تجرى الأيام تنقص وتزيد
حسب الأفراح
حسب الأحزان
حسب المواعيد
أيام بتعدى علينا ساعات
وأيام فى شهور
بتاخدنا بعيد
وأيام بتقصر فى المسافات
ترجع ذكراها بنبض جديد
بس الذكرى غير الذكرى
الليلة معادنا مع الفرحة
وبلادنا عروسة لابسه الطرحة
وف أول عيد
فاكرين ياولاد
25 من سنة فاتت
طب مين ينسى وفيه دم شهيد
....................
فاكرينه تلات غير كل تلات
كان زى جنين مولود جبار
بس المولود رغم الأفراح
مولود بالحزن وجاى بمرار
وبرغم الحلو اللى فى طعمه
دقت فى طعمه طعم الصبار
الليل من بعد ماكان عتمة
وف وسط الضلمة أنا شفت نهار
العبد المحكوم بقى يحكم
بقى م الأحرار
والحاكم من ظلمه فى سجنه
من سوء عمله ملفوف بالعار
وكتاب كاتبه الله ومقدر
شوفوا الأقدار
الحكمة اللى شافتها الدنيا
تلاثين سنة حكم فى ثانية
الحكم انهار
وكأنه قرار من عند الله
فى 25 مش أى قرار
الشعب أما بيملك صوته
بقى إيد واحدة
وبعين واحدة بتطق شرار
ساعة الوحدة
يتحول كل تراب بلدى
وقتها إعصار
والثورة أما بتكبر تجرى
من قلب ميدان
وطوفان من نور أرض وأشجار
الناس كلها واقفة تكبر
الله أكبر .. الله أكبر
زلزال بيهد عروش جبار
والفسدة تجرى على جحورها
تشوف لها مهرب
بس هروبها وقت غروبها
حواليه أسوار
حكايات الحكم ومفاسدها
تبتدى تطلع واكتب واسمع
واطرح واجمع وانقل أسرار
بس خسارة ع اللى فاتونا
لما انقطف الورد البلدي
وبدم أحمر تجرى الأنهار
عصافير بتطير ماشية تزقزق
قلبها أخضر عصافيرنا صغار
رووا بدماهم شجرة كبيرة
من سنة فاتت تطرح أزهار
مين ينساهم اكتبوا عنهم
إحكوا وقولوا لما الثوار
طالبوا بتغيير . حرية عدالة
ويا نعيش . كان أحلى شعار
وف لحظة جبن ولحظة غدر
تطير عالسما روح الأطهار
وعلم فى الإيد مكسور وحزين
عالأرض بيبكى فى ضرب النار
..........................
بس التغيير زى الزرعة
محتاجة الصبر عشان تطرح
أرض الصحرا م الصبح عمار
فى عيد الثورة
ربنا قادر يحمى الطاهرة
ترجع تانى لمجد الأخيار
الشعب المقسوم على نفسه
قراره فى إيده
وهيتوحد لما هيختار
ساعتها العيد يصبح عيدنا
مصر أمانة تبقى فى إيدنا
نكتب ليها أجمل أفكار
نقوم م الفرقة ونبنيها
نتلم كلنا حواليها
ترجع تانى للأمن مطار
........................
بلد اللى بيسهروا ويناموا
ومصر الغالية واقفة بتحمي
البيت والدار
بتقول شوفوا من سنة فاتت
بكفاية فُرقة وكفاية حُرقة
أنا راجعة خلاص
لازم يطلع لليل دا نهار
أنا صاحية وواقفة أناديكم
إتلموا عليا وحواليا
خليكوا إيد واحدة بدل مِية
قوموا وهِدُّوا للفرقة جدار
مش زرع ولادى ولا زرعى
دا زرع استعمار
ومع الوحدة أفرح بيكم
وأقوم من فرحتى أتحزم
وأقول يا ولاد ..من هنا أدى
وهفضل أدى وأدى وأدي
بحب وإصرار
ساعتها العيد ييجى فى المواعيد
إيدوا شموعوا قوموا وغنوا
إفرحوا فرحة كبيرة وهنوا
ما أنا أم الدنيا وست الدنيا
أنا فى القرآن . أنا ست الدار
أنا أم الدنيا . أنا ست الدنيا
أنا فى القرآن . أنا ست الدار