بيان للشعب.. كله يلمع قفاه

لم أصدق عندما قالوا لى إن مرشحاً رئاسياً عمل مداخلة تليفزيونية مع ناشطة وقال لها "هديكى بالجزمة"!!.. قلت لهم كلامكم ده مش معقول! وملوش رابط ولا ضابط واتقوا الله، فردوا: طب خد شوف الرابط ده، ومن ساعتها وأنا فى ذهول، فسامحونى إذا وجدتم حروف هذا المقال مهزوزة، واعذرونى فمن يتقدم لهذه الوظيفة الرئاسية المفروض أنه مرشح مبيخرش الميه!، خاصة فى اللحظات دهيه اللى هى تمهيد للدعاية الانتخابية.. فيا داهية دقى، وأقول لكل الشعب المصرى: إذا كان بيقول هذا الكلام وهو لسه مبقاش رئيس النادى اللى بيعافر على رئاسته بقاله سنة، فانتظروا المزيد لذلك.. هذا بيان منى إلى الشعب المصرى قاطبة.. كله يستعد ويلمع قفاه.. وأنا شخصياً حلمع قفاى بورنيش سبراى عشان مريح ومش كل شوية من الضرب أرجع ألمعه تاني، وشنبى سأحتفظ به عشان ربما أحتاجه رباط لبقى، عشان ما أفتحوش.. ومعلش متقولوش الرباط بقى موضة قديمة، دلوقتى فيه الشريط اللزاق.. مش مهم إنى أتبع أحدث خطوط أو شرايط الموضة، المهم أى حاجة تخلينى أحترم نفسى وقت اللزوم لأن الراجل بسم الله ماشاء الله طايح فى خلق الله من زمان ولما مرة حد ضيق عليه قال: إن الرئيس اتصل بى عشان يطمئن على لما عملت حادثة عربية.
وأتوقع أنه فى عهده الميمون سيتم تغيير الرقم القومى إلى "المقاس القومى" ويبدأ ب 41، 42، لكن صعبان عليه اللى من فئة (big & tall). ورغم أنى لست مرشحاً للرئاسة أقول لكل فئات الشعب: تخفيفاً منى عليكم وبأسعار لا تقبل المنافسة سأقوم بافتتاح شركة" قفا دوكو" ومن المخطط أن يكون لها فروع فى كافة مدن وقرى ونجوع مصر المحروسة، وعندنا خدمة توصيل الدوكو للقفا، فى أى مكان خاصة المصريين فى الخارج.
لك يا مصر سلاماً وسلاماً يا بلادى إن رمى الدهر سهام مرشح أتقيها بفؤادى واسلمى فى كل حين. والله ماهى ناقصة حنتلقاها منين ولا منين، من البلطجية ولا الفلول.. ولا ألتراس الكورة اللى بيعملوا كل ما هو مش معقول؟!!... يا خفى الألطاف نجنا مما نخاف. والسلام على من اتبع الهدى.