مين قتل ياسين ؟

يابهية وخبرينى ع اللى قتل ياسين
يابهية وكلمينى طب ليه اتقتل ياسين
يابهية اوصفيلى إزاى قتلوا ياسين
ردت بهية حزينة مكسورة ودموعها نازله م العينين
قالت قتله مصرى زيه لكن لاعنده مله ولا عنده دين
ده ياسين كان شاب مصرى عمره يادوب عشرين
كان نفسه يشوف بلاده حُره طاهره م الظالمين
نزل يعلنها بصراحة فى الشوارع والحوارى والميادين
حتعيشى طاهرة يابلدى وفخورة بولادك المخلصين
طلعوا عليه كلاب الحراسة جعانين مسعورين
ضربوه بالرصاص الحى فى صدره وكمان فى العينين
افتكروا لو مات ياسين حتموت بهية وتكون م الهالكين
نسيوا إن لو مات ياسين فى غيره ألف ألف ياسين
وعد ومكتوب على كل مصرى ومسطر على الجبين
ناخد حقك ياولدى ونقضى ع الخونة المجرمين
وتعيشى حرة وطاهرة يابهية وفداكِ مليون ياسين
يا بهيّة وخبرينى وقولى مين بكّاكى مين
مين عايز يطفى شموعك ويسيب ليلك حزين
مين عايز يخمد ثورتك يقتل فرحتك يخليها حزن وانين
مين يابهية باعك ومين اشترى ومين شايلك ف العينين
ياأغلى من عنيه يابلدى ياعشقى ياحضن الموجوعين
وعد ومكتوب على كل مصرى ومسطر على الجبين
ناخد حقك يابلدى ونقضى ع الخونة المجرمين
يابهية وخبرينى ع اللى قتل ياسين
يابهية وكلمينى طب ليه اتقتل ياسين
يابهية اوصفيلى إزاى قتلوا ياسين