يا بهيّه وخبرينى

الشاعر الأسمرانى
قلبه لساه حزين
غناويه سكتت فى قلبه
وإن قالها يقول لمين
وأنا قلبى الأخضرانى
أبو ضحكه إسكندرانى
صابر ع المستخبى..والمكتوب ع الجبين
ويا بهيه خبرينى.. ع اللى قتل يا سين
قتلوه السود عيونى .. ورموش دبحوا الوتين
وغناوى إسكندريه
جنب الموجه العفيه
ماعادوش يشفوا الجروح
فى قلوب العاشقين
أنا رحت للمداوى
أشكى همى الدفين
بص فى عينى وقاللى
شكلك باين حزين
قلت .. وعْد إنكتب لى
وإتسطر ع الجبين
قاس لى المداوى نبضى
وبص فى العينين
وقال يلزم أشعه
وياريت تبقى رنين
وبعد ماشافها..قاللى
فيه حاجه فى البطين
سهم ..أو رمش جارح
وصابك من يومين
والقلب عليل بينزف
ياترى ..مين صاحبه مين؟
ظاهر م الصورة ظالم
وربك ..ع الظالمين
يا إبنى روح لأم هاشم
أو حتى زور الحسين
وإدعى ربك يجازى
مَن ظَلم العاشقين
رحت ودعيتله ربى
يسعده طول السنين
ويزيد حسنه وجماله
ويحفظه م الحاسدين
ياخد من باقى عمرى
ويزيد عمره سنين
وألهمنى يا رب صبرا
وأعنى يا معين
آاااااامين
رفعت محفوظ -الإسكندرية