في عام 2000، كتبت على غرار رباعيات الراحل صلاح جاهين أبياتاً تعبر عن واقع المجتمع المصري كما رأيته منذ نعومة أظافري، وأقدمه الآن لشهداء ثورة 25 يناير، وأذكر نفسي دوما أن "تعاطفك لوحده مش كفاية". اكتب يا قلم عن الشقا والهم قول يا قلم انطق ولا تهتم جواك يا قلم شخصين واحد حجر والتاني لحم ودم عجبي عليك يا قلم لما تكتب كلام لا ودان سمعته ولا نطقه اللسان حزين يا قلم على إيه؟ نسيت إنه.. كلام في كلام صنم وواقف حجر زى الصنم على عينيه عمى وفى ودانه صمم شاف الحديد بيلين ولا طلعله نَفَس عايز يقول يا بقر والناس تقوله نعم كتب الزعيم على سطر وساب سطر فاضي كتب في الأول أنا وفى التالت وأولادي راح الزعيم، وجه زعيم وفضلت أنا أهتف وأنادى يا زعيم الأرض دي بلادي زارني الزعيم ليلة في المنام قاللي أنا أصنع في مجدك وأنت تنام ماهو الزعيم وأمره لازم يُطاع بس القتيل لا بيصحى ولا بينام ليه عشان إيه انت مبسوط يا زعيم الفنا والقتل والموت لما يجيلك في يوم عزرائيل تفتكر هتعيش ولا هتموت زارنا الزعيم يوم فى حارتنا عطش الزعيم شرب من خيرنا وميتنا ماهو ده عرقنا ودى شمس الكريم بس دي مصر الزعيم مش بتاعتنا أفديك بروحي يا وطن سمعت فلان قالها ضحكت من قلبي ع الوطن والأرض دى مالها خيرها لغيرها وإحنا الغلابة لا عمرنا أذيناها ولا حاسين جمالها في عنيكي يا أمي نظرة هوان شقا وعذاب بس حضنك حنان صرختي فيا يا أمي أكون شجاع الشجاع رحل، وجه مكانه جبان ورا جبان غمض عينيك يا مرتشي وإتكسف مش خايف يا مرتشي تتشاف وتتكشف عجبي لما تكون الرشوة سلو البلد وأما يبان الشريف....يتقفش أنا اسمي إيه أنا مين أكون أنا أصل الحياة بس جوايا مسجون والناس لو تعرف حقيقتي تقول عليا ..... مجنون نصحوا الزعيم يشوف الشعب مبسوط ولا مخنوق نزل الزعيم على القهوة ونادى يا خلق هوووو أنا حبيبكم وبعنيا أخدمكم في حد منكم ... في الحشيش مزنوق موظف حكومة تعبان قرفان غلبان مهموم مظلوم مسكين بينام جعان طلبوا منه يبتسم فى وش الناس ابتسم... خلاص بقى كده إنسان أنا المصري بنيت المعجزات وعندي الحضارة والنيل والأهرامات يا خلق فوقوا بقى وبصوا ع اللي جاي..مش ع اللي فات أنا مش حِمل شعاع كهربا ولا قلع رموش ولا نفخ هوا أنا إنسان بياع في كلام وجناني مفيش منه رجا وطني أيا وطن تلات ورقات واللي بتصحى عليه .. عليه بتبات إمتى أشوفك حر زى الطير إمتى تزول من دربك المتاهات أنا ويأسى صحاب من زمن واليأس مر وبأدفعله تمن أما الأمل فطريقه سهل بس غدره عجيب..لا يؤتمن يا عيني عليك يا زعيم لما بتضحك ومش أي حاجة تضحّك الناس تخلى الزعيم..يضحك أكيد قالوله نكتة شديدة قوى يمكن قالوله الناس مبسوطة.. وبتضحك معالي سيادة فخامة زعيم البلاد تسمحلي أوصفلكم حال البلاد الناس تعبانة قرفانة زهقانة انزل وشوف...يمكن أنا كداب إحباط ويأس وملل واكتئاب نلمح شعاع الأمل نجرى يطلع سراب يا زعيم الملل والذعر والخوف لهو أنت فاكر نفسك حجر وإحنا الكلاب رحال يا ابن آدم زى التراب ويمكن يجيبه الريح فوق السحاب ومسيره ينزل للأرض تاني ماهو منها جه...ماهو أصله تراب نفسي ألاقى الأرض مليانة خير وألاقى الناس فرحانة زى الطير وأشوف الحب يحيى قلوب ماتت وأمشى في طريق مرسوم له خط السير احلم وارمي حلمك للحياة جايز يموت جايز تقول الآه وجايز وأنت ماشى في دروب الضلام تايه..وحيد..شريد.....تلقاه الحب في زمن الديابة حرام وما تستاهل عليه حتى الملام وإن رحت تشكى شكوتك ما تسمع م الديابة...كلام عجبي عليك يا ابن آدم يا مخلوق من تراب الخير جواك اتغلب والشر فيك غلاب ولو سألت نفسك ليه كتر الهموم ..يا شيال الحمول ولو زمانك يدور وييجي عليك الدور...ما تلاقى جواب جنيه مصري وبقى بربع جنيه ولا عارف أجيبه وبأدور عليه ولو صبرت وعاندت وتعبت ولقيته أرجع تاني وأحتار...هو يشترى إيه؟؟؟ عزبتك .. ورثها لمن تشاء ماحنا خلاص بقينا الهبل والبلهاء وأنت الزعيم تأمر لازم تطاع وإحنا الدم اللي في عروقنا...تاه بحبك والكلمة عندي ليها ألف معنى تعالى نحلم حلمنا وإيه يا حبيبتي يمنعنا زماننا قاسى وناسنا كلهم غش ونفاق مع إن أرض الله واسعة وتساعنا
