السيد شبل يكتب : شمس العرب

شمس العرب صرخت
انا شفت منكو العجب
ازاى ولدكو اتقتل ..
ولا خدتوا يوم تاره
ازاى تهمته عندكو تبقى انه كان ثاير
ع المحتل ع الغادر واتباعه
مين اللى قتل ؟
روحوا اسالوا مين اللى سكن داره
مين اللى مص دماه
واكل لحم اكتافه
مين اللى توبه لبس و اتنفس انفاسه
**
شمس العرب صرخت
انا شفت منكو العجب
ازاى بلدكو بتتنهب
وانتوا ولا سائلين
بترولكو راح و الشعب صار مسكين
عز العرب اتوارى فى ضحكة التنين
ياللى بتسأل اجاهد .. انت بتسأل مين ؟
جوابك عند الشهيد
مش عند اللى باعوا الدين
حارب ف كل ميدان .. خللى الميدان ميادين
بكره العرب يصحوا ويزحفوا ملايين
بكره هييجى الجواد و يهزم الثعابين
**
شمس العرب صرخت
انا شفت منكو العجب
إزاى تدوس أخوك وانت العدو دايسك
ازاى بتسجن اخوك وانت العدو سجنك
ازاى بتسرق بلادك وتديهم
ازاى تصير عبد وجيشك يبقى حاميهم
الارض دى ارضك ولا اراضيهم
ياللى اتخلقت حر .. ليه بقيت مذلول
الاهل هما حمايتك ... خليك قد القول
ياللى قتلت الوطن من اجل اسيادك
اشرب كاس المر واتغدى فى عذابك
شمس العرب رفضاك
نورها ما هيجيلك
اكيد شبابنا الحر بكره يقتلع بابك
هيهدم قصرك ويقتل السجان
هيفرض شروطه على كل عاصى جبان
هيوحد الأوطان
هيصير وطن واحد
مالوش غير هدف واحد
مالوش غير عدو واحد
مايعيش الا بكرامه وبعز و بايمان