عادل سلامة يكتب: زفة كدّابين

سيبك انتي م الكلام ده
إنتي أكبر من كده
مانتيش مراهقة وعيلة وهترقصي
علي طبل زفة كدابين
ولا الأغاني هتطربك
ولا الحاجات دي تخيل عليكي وتعجبك
إنتي الدماغ
وعارفة مين له قيمة فعلا وعارفة مين بتلاتة صاغ
وعارفة مين مخلص قوي
وعارفة مين مستهبلك
وعارفة مين بيقدرك
وعارفة مين مستسهلك
وعارفة مين هيموت عشانك
من اللي نفسه يقتلك
وعارفة مين مابين وبين
عارفة وعاملة مطنشة
ومصدرة الوش النشا
من غير ريأكشن يفضحك
وينقل الرد الأمين
والنعمة ده أنا لو مطرحك
ماكنت هاصبر بالسنين
واخفي اللي جوايا كده.. ده أنا كنت أطق
وكان يبان علي وشي آه
وكان يبان علي وشي لأ
مش بس وشي
ده أنا كنت هاقلع ملط قدامهم وأقول
أنا وأنا وأنا وأنا
إن كان سكوتي غرّكم لأ صحصحوا
وكله يثبت مطرحه
دا انتوا بإيد بتجرّحوا
وبإيد سخيفة تطبطبوا
هتلموا امتي الهوسة دي وتشطبوا
أنا شفت منكو العجب وسكت عطف وذوق
إنتو اللي فاكرين الأغاني هتنقذ المشنوق
أنا مش لبانة ف بق كتاب الأغاني ومطربين السوق