ورقة شجر للشاعر عمرو اسماعيل

بقلم : عمرو اسماعيل
ورقة شجر وقعت علي كتافي
تٌقل الحجر
وانا جرحي مش خافي
والشمس حاميه ع الراس
وانا من غير مداس حافي
رغم كل الاوجاع
الي انسرق مني والي ضاع
لكن شايلك علي كتافي
رأيت في المنام وجعك
وسكوتك عن الي واجعك
وخضوعك له وسط الجموع
وانا ببكي وانا موجوع
انا ببكي علي دموعك
مين الي قال انك في تعداد العوانس ؟؟
ومين الي خلاكي منبع كوارث
يا ام المصانع
والجوامع
والكنايس
والمدارس
بقي يعني احنا البهايم
وهو الي فارس
هو الي دارس
والاسم حارس
طب الي حارسك خانك
وسم دمك
وباع كرامتك وهانك
قادم ولاد عمك
وباع واشترا فيكي
باقل من ثمنك
سكتاله ليه ماتشربيه
كاسك
مش ده الي عراكي وسط الخلق
وداسك
مش ده الي فصل توب الذل علي
مقاسك
سكتاله ليه يا ما ناوليني قوام
فاسك
اخد بتاري وتارك من الخونه
حراسك
حراس قلوبهم حجر
حراس اصولهم غجر
مدنسين الطريق
بمحسوبيه ورشاوي
مقعدين فريق
مقهور ع القهاوي
غير ان ماتوا 2000 غريق
جرجس حنا ومحمود جرجاوي
كابوس يا أما بيألمني
كابوس قاصد يعلمني
ان املي في بكره انكسر
وتفكيري
مجرد تفكيري
يعتبر انظار خطر
..........................
ورقة شجر
وقعت علي كتافي
كل الي اتعمل علشانك
والله مش كافي
ومهما يكون تعبك
يطول عمري
و هافضل شايلك
علي كتافي
انا شايلك علي كتافي