طلاب الأزهر يحاصرون مبنى رئاسة الجامعة ويمنعون الموظفين من الخروج

تظاهر المئات من طلاب جامعة الأزهر، وبعض أعضاء هيئة التدريس، ظهر اليوم الأحد، فيما أطلقوا عليه، يوم"أحد الغضب"، الذى أعد له الطلاب بعد اعتصام دام أسبوعًا كاملا، حيث قاموا بمحاصرة مبنى رئاسة الجامعة، ومنع الموظفين من الدخول والخروج، مما أدى إلى استدعاء المسئولين للجيش لعدم حدوث أى احتكاكات بين الموظفين والمتظاهرين.
وانضم للطلاب حركة" 25 يناير لتطهير جامعة الأزهر"، لعدد من أعضاء هيئة التدريس، والذين أكدوا أنهم سيعقدون مؤتمرا صحفيًا سيتم التحديد له لاحقا، لكشف ما أسموه بالفساد فى الجامعة، وطالب المتظاهرون بإقالة قيادات الجامعة، على أن يتم اختيارهم بالانتخاب، بدءا من رئيس الجامعة والعمداء وحتى رؤساء الأقسام بجميع الكليات.
كما طالب المتظاهرون بإقالة القيادات الجامعية وتغيير لائحة الطلاب وتعديل قانون تنظيم الأزهر رقم 103 قانون، والبنود الخاصة بتعيين رئيس الجامعة.
ورددوا هتافات "شيخ الأزهر فينك فينك التعيين بينا وبينك"، و"أول مطلب للطلاب رئيس الجامعة بالانتخاب"، "تانى مطلب للطلاب كل عميد بالانتخاب"، "ثالث مطلب للطلاب تغيير لائحة الطلاب".
وانتقدوا تعيين رئيس الجامعة مرددين هتافات "رئيس الجامعة معين ليه هى تكية ولا إيه"، "رئيس الجامعة ساكت ليه هو علينا ولا إيه "،"مش عايزنهم مش عايزنهم أمن الدولة اللى معينهم"، "الانتخابات هى الحل"، كما رددوا هتافات الثورة "ارحل.. ارحل"، "رئيس جامعتنا بره.. عايزين جامعتنا حرة" "أول مطلب للطلاب.. رئيس الجامعة بره الباب وتانى مطلب للطلاب.. العمداء بالانتخاب".
كما رفع الطلاب لافتات كتب عليها "الانتخابات هى الحل"، "الطلبة تريد إسقاط العميد" "ارحل ارحل يا عميد.. ثورة ثورة مش تهريج".
وقام أحد الطلاب بإلقاء قصيدة وصف فيها حال الجامعة تقول "سجل يا تاريخ.. سجل يا تاريخ.. أعظم جامعة فى التاريخ.. المعيدين ما تلاقيش.. والدكاترة فينا تلطيش والشئون بتهزأنا والعميد بيطردنا... ونشتكى نلاقى وعود والوعود مفيش تنفيذ والتنفيذ عند الرئيس ورئيس الجامعة فينه..مش لاقيينه مش عارفينه وبتسألنى عايز إيه.. هيا الجامعة ناقصها إيه.. سجل يا تاريخ.. سجل يا تاريخ أعظم جامعة فى التاريخ.. معاملها بقت خردة والخردة بقت زبالة والزبالة فى كل مكان، كلنا شايفنها وعارفينها.. ورئيس الجامعة فينه.. مش لاقيينه مش عارفينه وبتسألنى عايز إيه.. هيا الجامعة ناقصها إيه..اسأل تانى وأنا هجاوبك ..أعظم جامعة فى التاريخ المدرج كله تراب والسابورة هباب فى هباب وطريقنا كله إزااااز والحمام مش آدمى وأعمل إيه.. أعمل إيه قولى يا بيه.. قولى يا بيه سجل يا تاريخ.. سجل يا تاريخ.
أعظم جامعة فى التاريخ أول دفعة يلزم داره ويتهان هنا عالباب أصله يا عينى من الأوائل عيب الجامعة ولا إدارة، وبتسألنى عايز إيه هيا الجامعة ناقصها إيه ظلم فى كل مكان يا أخواتنا والتنسيق لبناتنا ظالم والمدينة بقت خمسة والخامس مالوش سرير هاتوا من بيتك يا ضنايا وأنا مالى.. ما تغور بعيد وبتسألنى عايز إيه.. هيا الجامعة ناقصها إيه.. لأ كفاية.. كدا إحباط لأ كفاية.. كدا إحباط".