ولاد شوارع.. ف الميدان

فتّحت عينى رضيع
على سقف "ستة أكتوبر"
من ماية الشتا
الكوبرى ده غطانى
وبَلِف أبيع مناديل
أو ف السبيل.. عابر
ولما آآآجى أرّوح
رصيفه عنوانى
سمّونا.. ولاد شوارع
يبقى الشارع أبونا ؟!
قالوا ده شارع الحكومة
قلنا... دى مِراة أبونا
الليلة كنت جعان
جانا ضيوف كتير
باتوا معانا ف الميدان
جايبين معاهم خير
كانوا بيهتفوا: حُرية
عايزين كرامة وعدل
صَبَحنا صحاب قوام
وعرفت معنى الأهل
وف ليلة زى العيد
طرَح الميدان زغاريط
قالوا مُنانا اتحقق
أُس الفساد.. غار
نِزلتْ من عينى دمعة
هتمشوا وتسيبونا؟!
ده احنا عِشرة ميدان
يا معشر الثوار
فرحان أنا ليكوا
فرحان أنا بيكوا
بس أمانة عليكوا
ابقوا تعالوا زورونى
واوعوا ف يوم تنسونى
ده حلمكوا اتحقق
يمكن .. عشان أنا فيكوا