أيه رأيك؟

أيه رأيك لو نرجع تانى لحكومة الباب العالى
أو نبقى تراكوة وخلاص ونروح اسطنبول طوالى؟
بصراحة الدولة التركية محترمة وقادرة وعافية
عايشة فى الدنيا بكرامة وعلمها دايما فى العالى
...
إيه رأيك نلبس طرطور وندق على قفانا عصفور
ونغمض ونمشى نلطش علشان الباشا الغندور؟
بيحط حراسة على سفارة حكومتها غبية وغدارة!
والأدهى بعرق أولادنا بيشيد ويعلى السور!
...
أيه رأيك فى العلم المصرى لو نصبغه كده أسود فى أسود
وبدال النسر اللى عليه نرسم ندابة بتعدد؟
وبتلطم على ناس نايمين من يوم الثورة تايهين
والقاتل اللى بيتحاكم فى سريره نايم ومدد
...
أيه رأيك لو نلبس ديل أو عمه ليها زر طويل
ونحط حداوى فى رجلينا وجرس فى قفانا وشخاليل؟
علشان المجلس يرتاح ولا يشغل باله كل صباح
بالثورة وشباب الثورة وكفاية علينا ألف قتيل
...
أيه رأيك أنا كده هتجنن وهموت من كتر التفكير
اخترنا (عصام) من وسطينا وأملنا يقوم بالتغيير؟
ولا غيّر حاجة ولا بدل ولا حالى وحالك اتعدل
أنا خايف نطلع فى الآخر أنا وأنت اللى طلعنا حمير