شوف قدرة ربنا

شوف ربنا شوف قدرته
شوف وأقرا وافهم حكمته
شوف ايه جرى للى افترى
بعد اما خلصت مهلته
سبحانه من علّا ورفع
وسقط بأمره اللى ارتفع
والكل ليه ذل وخضع
ومفيش كلام فوق كلمته
سبحانه من طلق اللسان
وفتح لنا كل البيبان
وفرش لنا أرض الميدان
ونصر شبابنا وثبته
مين كان يقول اللى اعتلى
على عرش مصر المبتلى
ح يتوه فى حل المسألة
فى السجن ح تكون آخرته
يا نظام فى سرقتها انبرى
بعتوا البلد للى اشترى
للشعب دا كان ايه جرى
لو ما مشيتوش من سكته
قلوبكوا ماتت م الطمع
وقلوبنا ماتت م الوجع
وعطاكوا لكن م الجشع
كله اعترض على قسمته
قلبتوا ليل الناس نهار
وزرعتوا هم ف كل دار
واللى حصل كان باختصار
مظلوم دعاه جاب دعوته
بالزور خرجتوا على الملأ
وغباءكوا مرسوم ع الورق
كان صوتنا لازم يتسرق
ووريثنا ياخد فرصته
من ظلمكوا ابليس بكى
وصعب عليه اللى اشتكى
للجن قال فى المملكة
على عز ادعوا وشلته
حولتوا مصر لسلطنة
ولبستوا توب الفرعنة
ابليس أمير الشيطنة
خبرتكوا فاقت خبرته
أنا نفسى أعرف منكوا
قبل التراب مايلمكوا
ايه راح تقولوا لربكوا
يوم اللقا وف حضرته