راجع بعد صلاة العيد راجع باكى وفكرى شريد ضاقت بيا الدنيا وحاسس إنى بقيت فى الدنيا وحيد أول عيد بيعدى عليا وأنتى يا أمى مش حواليا أول عيد مارتاحش فى حضنك ولا ح تدفى ايديكى ايديا كنتى يا أمى العيد والفرحة كنت بنام على حبك واصحى بعد رحيلك بسأل نفسى ح أهدى لمين الشال والطرحة كنتى أحن وأطيب قلب واتحملتى الزمن الصعب شيلتى جبال الهم وقدرك تبقى الأم وتبقى الأب قلبك كان انسان يسمعنى ومفيش بعدك حضن يساعنى ومفيش غيرك حد أشكى له م اللى تاعبنى واللى واجعنى وسط الناس وبعيش وحدانى وماغبتيش عن بالى ثوانى وساعات قبل ما انام أتخيل أول ما اصحى ح اشوفك تانى بعدك أعلن قلبى حداد صعبة العيشة ومر الزاد بعدك مات الفرح ف قلبى ونسيت كلمة اسمها أعياد روحتى وخدتى البركه معاكى وبيوحشنى يا غالية دعاكى انتى يا أمى هناك فى الجنة وأنا بتمنى أكون وياكى