أمى عَلِيكِ السَلامْ

فى عيد ميلادك يا أمى
بَدْعِى لك
والدعا شوية عليكْ
سبحانه من خلق الحنان
انهار تجرى بين ايديكْ
وخلا قلبك يساع الكون بالحب
بنشوفه ف عنيكْ
وخلا كل الناس تِشهَد لك
تدعى لك وتدعى لوالديكْ
يحفظك ربى ويصونك
تعيشى والمولى راضيكْ
يا طاقة النور فتحها ربى
تنور مهما يكون الظلام
مش عارف أكتب فيكى إيه
وحروفى عاجزة عن الكلام
يا نسمة الصيف فى عز الحر
ويا حضن الدفا فى عز البرد
وف وسط الزعل
جناحك يرفرف
بمليون حمامة سلام
كفاية النظرة فى وشك تِشَبْعْ
وتشفى من كل الآلام
معرفش أكتب لك قصيدة محبة
وألا أكتب لك إيه؟
والله ما يكفى كل اللى كتبوه
فى كتب العشق وف كتب الغرام
دا القرب منك ألف جنة وجنة
والبعد عنك هو بعنيه الحرام
والله لولا الغربة والعيشة
وقدر الله اللى كتبه علينا
لجيت لك لعندك
أسهر على راحتك
سعادتى أشوفك وجفنك ينام
الله يرحم اللى خلفنا من أم طاهرة
اختارها من وسط أمة وقام
عليكِ من ربى ومِنْى وولادى يا أمى
مليون مرة عليكِ السلام