على وضعك يا فندم

زى مانت.. والله مانت قايم.. يا شيخ تتعب نفسك وتقوم من الدفا وجهازك العصبى يكهرب ورجليك تتذغذغ وإيدك تتلج..علشان إيه يعنى! علشان تشرب ميه.

دة أنت دافع مهر اد كدة من خماشر سنة. تقعد بيه عمرك كله سلطان زمانك. اطلب واتبغدد بفلوسك يا معلم ولا فندق خمس نجوم.

سيادتك يا فندم عاوز ايه !! عاوز أنام وادفى.. بفلوسك يا فندم نادى على الأمورة تقوم من الدفا وتغطيك.. عاوز أكل.. بفلوسك يا فندم نادى على الأمورة تحط لك الأكل فى بؤك وتستناك لما تخلص وتشيلك الطبق.. عاوز اشرب.. بفلوسك يا فندم نادى عليها وطلعها من الحمام تجيبلك ميه.. روحى يا قطة اقلبيله ريموت الكنترول دة دافع فيكى مهر.. عاوز ممممم مش جاية فى بالى حاجة.. خليكى ياقطة ستاند باى لما يجى فى باله حاجة.

أنا عن نفسى بقترح أن الست تجيب هى الشقة وتدفع المهر علشان محدش يبقى كاسر عنيها.. أو يكون المهر له مدة صلاحية عشر سنين تتجدد تلقائى.. طبعا دة المهر مش الجواز!!

أصل مش معقول علشان شوية الكام الف جنية دول الاقى نفسى دادة ومدرسة وطباخة وأم سعدية ومطلوب كمان أبقى زيزى الرقاصة.

طيب كله كوم وزيزى الرقاصة دى كوم تانى خالص.. إزاى بعد المربية وأم سعدية!! الركب بتطاطا من كتر الجرى ورا الولاد، وإزاى بعد المدرسة.. الشعر بينعكش زى المجنونة والصوت بيتنبح ولا كانى أخده حتة حشيش معتبر. وفى الاخر.. زيزى!! حنضحك على بعض ونمثل؟!
طيب أنا عاوزة رشدى أباظة!!! ولا أنا مش من حقى أعوذ.. مليش نفس يعنى!!
طيب أنا عاوزة ممممم.. أنا عاوزة أعيش!! عاوزة الناس تقتنع انى كائن حى يرزق ويشعر وياكل ويشرب وأهم حاجة يدخل الحمام. ليه كل ما ادخل الحمام الاقى حد بيقولى "بتعملى إيه!"
السؤال دة ناتج من إنى كائن لا يستخدم الحمام وآثار دخوله الحمام الانتباه والتساؤلات!! أم أنه ناتج من اقتناع الجميع بأنى كائن اجتر الطعام!!
بجد من حقى ساعتين يوميا يبقوا بتوعى أنا مش سارقاهم.. من حق كل ست يبقى ليها وقتها هى والكل يبقى عارف أن دة وقتها بتاعها..تعمل اللى بتحبه.. تقرا أو تكتب أو تروح الجيم أو الكوافير أو تخرج مع صاحباتها.. اللى هى عاوزاه وبلاش مصمصة الشفايف وكلمة "شكلها ما وراهاش حاجة" ويا سلام لو حاجة وحشة حصلت حتلاقى الجملة المعهودة "تسم.. طبعا ماهى فاضية للقراية أو الخروج أو أو أو وسايبة اللى وراها..تسم".. مع العلم إن حتى اللى قاعدة اليوم كله متنحة فى ابنها وخايفة عليه.. برضه حيحصل حوادث الأطفال وبرضه حيتقال"وهى بتعمل إيه..مش تاخد بالها!".
حطى لنفسك ولغيرك قواعد مش بتتغير..
1- ليكى حقوق زى ما ليهم حقوق.
2- عليهم واجبات زى ما عليكى واجبات.
3- كل واحد يقوم بواجبه كامل ما يتكلش على غيره.
4 – الكل يدى الحق لصاحبه.. مش يستنى لما صاحب الحق يطالب بيه وينشف ريقه.
5 - أنت عضو فى الأسره ولست كل الأسرة.
6 – من حقك تدخلى الحمام عادى جدا زيهم من غير ما تواجهى أى أسلوب تعجب.
ومن منبرى المتواضع هذا أدعو دار الإفتاء بالتعاون مع المجلس القومى لحقوق المرأة مع مجلس الشعب بالإفتاء بضرورة تجديد المهر كل خمس سنوات بالسحب من رصيد الزوج أن تواجد طبعا لصالح زوجته وزيادة المهر فى حالة تزايد عدد الأطفال فى المنزل حتى يتسنى للزوجة عمل صيانة دورية لعضلاتها وأحبالها الصوتية وأجهزتها العصبية وتشحيم للمفاصل والركب.