عبدالرحمن حجاج يكتب: فعل الانتظار

اوقات كتير بنفتكر ان لما بنستني شئ معين ان احنا كده بنقتل الوقت
في حين ان في الاغلب الوقت هو اللي بيقتلنا و ليس العكس
ابسط حاجة عندنا كمصريين اننا نبرر تأخيرنا عن مواعيدنا بعذر ان خلاص خمس دقايق و هبقي عندك او عذر اني خلاص جاهز والله بس بدور علي فردة الجزمة..دايما فيه تبرير للتأخير و انتظار الناس لينا في حين ان الانتظار ده في اغلب الاوقات ده لو ماكنش كل الاوقات ماحدش بيستحمله ولا بيقبله علي نفسه.
من و انا صغير و انا عندي فوبيا من الاسانسيرات،كتير بحاول اتغلب علي مخاوفي دي و اركبه ،مش هحس ابدا بقيمة الخمس دقايق اللي بستخف بيهم في العادي الا لو الاسانسير اتعطل بيا و فضلت جواه خمس دقايق و كل فكرة مرعبة عن الاختناق و الموت تتخلل عقلي اللي هيموت من الرعب..
لو قعدنا كده و جبنا ورقة و قلم و حسبنا حجم الوقت و المواقف اللي بتحصل لينا بتخلينا نستني ،يمكن ساعتها كنا نقدر و نحترم الوقت شوية..
الوقت اللي بنستناه جوا البنزينة علي ما العامل يملا التانك و العامل اللي قصاده يمسحلك الازاز اللي في الاغلب هيبقي اوسخ من عما كان في الاول و العامل التالت اللي بيعرض عليك زيوت و حاجات كتير للعربية انت في الاغلب مش بتسمع منها اي حاجة عشان بتبقي خلاص جبت اخرك من الانتظار في طبور طويل علي ماييجي دورك..
و بذكر الطوابير لازم نفتكر انتظارنا في فرع شركة المحمول و اللي بيبقي دايما زحمة،تفضل مستني دورك ربع او نص ساعة و في الاخر بيبتسم الموظف ابتسامة صفرا في وشك و يقوللك معلش يا فندم اصل السيرفر واقع..نفسي اعرف السيرفر ده بيقع فين!!
بنستني حاجات كتير علي مدار اليوم و احنا مش حاسين،بنستني نعدي الحتة بتاعة رمسيس علي كوبري اكتوبر اللي دايما واقفة و مش بتتحرك،بنستني نلاقي فيلم حلو شغال علي التلفزيون عشان نبدأ ناكل،بنستني اصلا ان الاكل يجهز او يوصل ،بنستني اعلانات اليوتيوب تخلص،بنستني علبة الكاتشب يجبها الراجل في المطعم عشان نبدأ في التهام البرجر،بنستني المنيو و بنستني الباقي اللي في كثير من الاحيان الجارسون بيأخره لحد ما ننساه،بنستني الجيلي يسقع و بنستني الشاي يبرد شوية ،بنستني دورنا عند الحلاق ليلة العيد و بنستني لحظة هدوء في البيت عشان نقرا كتاب راكنينه بقالنا شهور او نتفرج علي حلقة من مسلسل اتعرض و ملحقناهوش..
لو فعلا ركزنا شوية و ادينا اهتمام اكتر لفعل الانتظار هنلاقي ان قائمة الانتظار تقريبا لا تنتهي..الطالب الفاشل بيستني نص الوقت يعدي عشان يسيب اللجنة و يطلع يشرب سجاير،و نفس الطالب بيستني النتيجة بالايام و الليلالي رغم انه عارف كويس هو عمل ايه،الصياد بيستني اليوم كله عشان يطلع بشوية سمك محترمين،الصايم بيستني المغرب ييجي عشان هيموت علي كوباية مياة،المريض بيستني الدوا يبدأ يعمل مفعول عشان يرتاح شوية ،اللي نفسه يسافر بيستني الفيزا و اللي مخنوق و زعلان بيبقي مستني الفرج ..
بنقول دايما للناس تصبر و تستني في حين ان لو جينا نطبق نظرية الانتظار دي علي نفسنا بنرفضها و بنبقي عايزين كل حاجة تيجي و تحصل في ساعتها..
بصيت للورقة اللي فيها افعال الانتظار لقيت ان حتي بعد ما الورقة تخلص لسه في حاجات كتير اوي مكتبتهاش او مستني افتكرها..
الانتظار في المطلق غلس و يخنق..المهم فيه ان اللي بيستني ده يحط مع انتظاره شوية امل علي شوية صبر و يقول يا رب :) .