مساء الخير استاذة نيفين المشكلة اني حبيت شاب من سنة ومتفقين على الجواز وفجأة إبتدى ينسحب شوية بشوية لغاية ما إختفى خالص ومش عارفة أوصله نهائي .. كلمت اللي يعرفوه محدش إدالي رد مهم وحسيت من كلامهم إنهم مخبيين حاجة أو هوة موصيهم على الكتمان , وانا كنت بلغت أهلي خلاص إن فيه شاب هييجي ويتقدم وكدة وفجأة زي ما قلت لحضرتك إختفى .. لكن إتأكد من شغله إنه بخير وموجود لكن مقدرش أروحله شغله لأسباب كتيرة يطول شرحها وانا مش بتاعة خناق وفضايح وأخاف برضه من أي رد فعل مش محسوب منه .. مش عارفة أعمل إيه ارجو الرد بسرعة ويمكنك نشر رسالتي يمكن حد من السادة القراء يفيدني بحل وشكرا ليكي .. دايما في الخير يارب وآسفة على الإطالة . ن . م فضفضة محررة الصفحة .. نيفين حجازي يمكن ردي يكون عليكي غريب .. لكن الوضع دة ملوش غير تفسير واحد .. إن الشاب دة مكنش من الأول ناوي خير ولما بدأ يشعر إن الموضوع داخل في جواز وهيقابل أهل و هيدخل بيوت الناس من بابها حصل اللي حصل منه , أنا لو منك هقطع الصفحة دي تماما من حياتي كما لو إنه فيلم سخيف دخلته وبمجرد خروجي منه إنتهى اليوم .. صحيح دة مش سهل .. لكن أحب أقولك .. هتبكي عليه ليه بعد ما هنتي عليه سنة كاملة ؟؟ ولا إيه ؟! .. دربي نفسك على إن اللحظة اللي تتعرضي فيها لحاجة من النوع دة هية نفس اللحظة اللي بتمسحي تفاصسلها من دماغك .. وهقول تاني .. صحيح دة مش سهل .. لكنها الطريقة المثلى لمواجهة الحاجات غير المفهومة أو غير المبررة .. لانك لو فضلتي في نفس الدايرة مش هتاخدي من الموضوع غير وجع القلب والإكتئاب وغيره .. وبرضه مش هتطلعي بنتيجة .. حاولي دايما تتعاملي مع الواقع مش مع اللي نفسك فيه .. لو علينا .. كلنا نفسنا نمسك من السما حتة .. لكن دة ممكن يحصل ؟ طبعا لا .. يبقى ليه أفضل مصرة أعيش على أطلال ! .. أو زعل على أطلال يوديني جوة دايرو مفرغة مع الوقت يستحيل الخروج منها غير بأمراض نفسية ؟ !! .. حاولي تكوني متزنة الأيام دي أكتر من أي وقت تاني وإذكري ربنا كتير .. وكل ما الموضوع يخطر على بالك إفتكري أهم حاجة بعد ربنا .. وهية إنك إنتي الكسبانة .. تخيلي لو الشخص دة حصل بينك وبينه نصيب وهوة بالأخلاق دي أو بيفكر بالمنظر دة .. شكل حياتك هيبقى عامل إزاي .. ليه ما فكرتيش إن ربنا بموقف الشاب دة أنه أنقذك منه صحيح مضايقة لكن اللي أنا متأكدة منه إن ربنا أنقذك من شر كبير أو على الأقل ملكيش فيه نصيب .. ولا إيه ؟ .. اصبري اصبري وهتشوفي ربنا هيكافئك إزاي .. الدنيا سلف ودين والصبر جميل .. والخبرات مش بتيجي من فراغ عادة بتيجي من الألم والبكا والوجع .. ربنا معاكي ويعوضك ويحميكي يارب من كل الشر . [email protected]