من المدرج: بعيدا عن الكرة.. أنا الشعب !!!

صباح الخير سيادة الرئيس .. والسادة الوزراء .. والسادة المسئولين اللي دايما مبسوطين يااللي مش خايفين من الأمين .. ولا الظابط اللي مراته منكدة عليه .
صباح الخير عليكم جميعا .. احب اعرفكم بنفسي .. انا المواطن المصري البسيط .. ايوا هو ممكن حضرتكم تكونو نسيتو الموضوع ده ان فيه مواطن تاني مصري عايش في البلد ديه لا هو ( اخوان ) ولا هو ( بتاع طبلة ) هو مواطن عادي خالص عايز يعيش في سلام ويضمن لولاده حياة هادئة محترمة .
بص يا بيه منك ليه .. انا البلد .. انا اللي مش فارق معايا حضرتك منين وتبع مين وبتحب مين وبتكره مين .. انا يا فندم اللي بحب مصر بدون مقابل .. انا اللي بتعلم بفلوسي .. وبعلم ولادي بفلوسي وبدفع ضريبة على كل حاجة بعملها حتى سندوتش الفول اللي باكله كل يوم وانا رايح شغلي .. ايوا يا فندم انا بدفع ضريبة على أي حاجة بعملها في حياتي وانا المواطن الوحيد في العالم اللي بيعمل كده !!
مش مهم .. مصر محتاجاني فعلا .. فمش حركز معاك في الموضوع ده .. بص يا بيه منك ليه .. انا المواطن المصري اللي ليا اصحابي اتخرجو من سنين ولسه لحد دلوقتي مش لاقين شغل او شغالين في أماكن ( قطاع خاص ) اه والمصحف قطاع خاص .. ومرتبهم لا يتعدى ال4 الاف جنيه ... مطلوب بقى منه انه يعيش بيهم ويأجر شقة ( لان طبعا علشان نشتري شقة في الزمن الجميل ده اشبه باني اتجوز انجيلينا جولي وهي في عزها ) !!
مطلوب بقى منه انه يأجر شقة ويصرف على بيته ويدخل عياله مدارس محترمة وطبعا فيه بتاع الف جنيه كده كل شهر على الدكاترة ؟؟ ليه لأن احنا عندنا كل حاجة يا فندم بتجيب المرض .. الأكل بيجيب المرض .. والماية .. والحلويات .. والفاكهة .. اه نسيت اقولك ديه الحاجات اللي احنا بناكلها مش اللي انت بتاكلها يا فندم .. انا بتكلم على الرعاع اللي زيي يا فندم !!
بص يا بيه منك ليه .. احنا الشعب اللي بنمشي في الشارع خايفين من كل حاجة .. اه خايفين من مقطورة تيجي تهفنا .. من ميكروباص يجي يقرر يركب فوق العربية بتاعتنا .. من امين شرطة شكلي ما يعجبهوش فيضربني بالنار .. من ظابط كده مضايق فيقرر يعمل عليا نمرة .. خايفين نجيب سمك علشان مسموم .. وخايفين ناكل فراخ علشان عندها انفلونزا .. خايفين نطعم عيالنا في الصحة علشان مش ضمنين ايه نظام التطعيم .. خايفين من كل حاجة يا فندم عايشين كده وكأننا ولا مؤخذة ... نمل .. خايف حد يدوس عليه .
بص يا بيه منك ليه ... احنا الشعب اللي ساكت .. اللي شايف احمد موسى ومرتضى منصور والابراشي والعكش وغيرهم .. وساكت .. ولا بيقول حاجة غير ( حسبنا الله ونعم الوكيل ) .. احنا الشعب اللي شايف ان فيه حكومة احنا لحد دلوقتي ما نعرفش رئيسها ده شغلته ايه بالظبط وهو بيعمل ايه بالظبط .. احنا الشعب اللي امين الشرطة ممكن يموت حد فيه عادي خالص بدون مشكلة .. احنا الدولة الوحيدة يا بيه منك ليه اللي الناس بتخاف من الداخلية بتاعتها مش بتخاف من الحرمية والمجرمين !!!
احنا الشعب اللي الغلبان فيه علشان يتعالج في مستشفى حكومي معناه انه يروح ومعاه كفنو علشان احتمال كبير ما يخرجش منها .. احنا الشعب يا فندم اللي عايش قلقان .. مظلوم .. مكتوم ... خايف .. محشور في الزجاجة ومش شايف العنق بتاعتها اللي حنخرج منها .
احنا يا بيه منك ليه .. الناس اللي استحملت .. وحتستحمل .. وحتساعد علشان البلد .. احنا اللي بنقولكم .. اتقو الله فينا وفي البلد .. علشان فيه مننا ناس غلابة اوي .. بس صوتهم عالي اوي .. وصرختهم عالية اوي .. وجرحهم عميق اوي .. وصمتهم زاد اوي .. ولكن احذرو من انفجارهم أوي .. هما على فكرة مش فارق معاهم ( انت مين ولا انا مين ولا البلد ديه رايحة فين ) اللي فارق معاهم اوي .. ان احنا نسيبهم يعيشو .. مش بعد كل الظلم ده نموتهم !!!
باشا .. باشا .. باشا ... انا الشعب بقولك .. سيبك من اللي حواليك وانزل ليا .. تعالى شوف ايه اللي ناقصني .. تعالى حاول تزرع جوايا امل حتلقيني .. ضهرك .. حتلاقيني سندك .. حتلاقيني درعك .. حتفضل مش واخد بالك مني كده .. مش حتلاقيني خالص !!
الا هل بلغت .. اللهم فاشهد