مدرس بلدى

يا مدرس بلدى.... من الدولة ناقصك تقدير.... ف المدرسة بتعلّم ولدى... ومرتبك
ف الشهر مش كتير.... نفسى يجى يوم وسيادة الوزير.... بخطوة حلوة يقوم ويعمل
تغيير....ولأوضاع مدرسين بالكوم... يعمل إعادة تقدير... كفايانا صح النوم....
الوضع بقى خطير... والمدرس معانا مظلوم... ع الحال ده بقاله كتير...
زمان المدرس كان وضعه تمام... كان يدخل يدرّس كله ساكت التزام....
والطالب كان محترم معاه.... وف كلامه كان يقف انتباه... أما النهارده الوضع
تلقاه... مدرس بيشرح بعلو الصوت... وطالب بيصرخ ويقول توت...
ولو عاقبه المدرس على عمايله... يرد القلم شلوت... ويتلّم عليه هو وزمايله...
وعلقة تفوت ولا حد يموت... كفايانا على وضع المدرس سكوت...
خلينا راسه براس التلميذ... وسبنا وقت كتير يفوت... من غير جديد شىء
يغيظ.... يا اللى منعت المدرس... يدى دروس خصوصية.... خايف ع الناس
الناس تفلّس...طب ما تزودله المهية... ويا ريت لو تسهل العملية...
وتعدّل المناهج الدراسية...وتخلى للمدرس أولوية.. ف الخطة الخمسية
الجاية... يا ريت تخلى بالك من مدرس بلدى... عشان خاطر ولادك وكمان
عشان ولدى.