نائب.. وزير.. ورجل أعمال

السُلطة واتجوزت المال * * ولا حد خاف لا الكيل يطفح
وبالشفا ومش عايزة جِدال * * حايجَرَّبوا فينا الأنقح
أصل الوزير رجل الأعمال * * محتاج صوتين علشان ينجح
خِصم وحكم، بيشوط ويصُد * * من غير خجل يسأل ويرد
ومعاه قلم إن كان ولا بد * * رصاص بأستيكة بتمسح
الصبح يستجوِب نفسه * * وينقى قوانين على نِفسه
ولا حد طابق على نَفَسُه * * ولا صوت ولا عين بتبَجَّح
والضُهر يفقد ويخصخص * * وأراضى بالميل تتخصص
وإن فاض لنا عجل معصعص * * يمصمص الديل ف المدبح
والعصر يرجع لسيجارُهُ * * ويشب للسما مُنخارُه
بالليل مبادئه بينهارو* * والصُبح ترجع تتصَّلَّح
يا ناس دا حايجيب وقت إزاى * * ومين حايسمع منَّا الجَاى
وه وبعد ال "هاى" باى باى * * وقبل ما ييجى يِرَّوُّح
أكيد وراه شِلة أقزام * * ما بيقولوش غير كُلُّه تمام
ه وإللى زيُّه إزاى بينام * * وإللى ف رقبته بيتشرَّح
ماهوش عشان دخل إضافى * * أ وجوز أرانب خَفَّافى
ما فاضلشى غير لحم كتافى * * دول صحتين وإياك يربح
لازمتها إيه المِدادِيَّة * * أصل الرعية، الناس دِيَّة
غلابة، لأ، مالهاش دِيَّة * * م الجوع ماتقدرشى تِفَتَّح
اعمل لى فيهم ما بدالك * * مادمت من وَسَع إدالك
مايعرفوش حد بِدالك * * والداهية لا تكون الأصلح
لخدمتك بتجندهم * * وبكلمتك بتسَّجِدهم
وآخر اليوم تجلدهم * * والأعمى بيجُر مكسح
عشان يروح يدِّيك صوته * * ويمضى ويأجل موته
أصل الوزير الكوت وموتو* * دبح له عجلين واتبحبح
يكونشى من قلة ألقاب * * ويبقى باشا معالى جناب
ما تفتحوش، لأ فُكُّوا الباب * * سعادته هالل عالمطرح
الرزق يهوى الخِفِّية * * والقُبة حسنة ومخفية
تِنساش تِفُك الحنفية * * خَللى إللى بعدك يتسوَّح
وتقول سيبوه ينشف زيته * * وما يلاقيش إللى يغيته
وم العرق يخرب بيته * * كأنه كان زير بيرشح
وف كل دَورة إنت الشغال * * ملموم عليك شُبان وعيال
ياما عليك تورد أجيال * * وإنت إللى مانتاش متزحزح
وف الدعايا اكتب بقَّال * * سباك وترزى حريم ورجال
نائب - وزير- ورجل أعمال * * يستجرى واحد يترشح؟