الدبيحة

قومى اعمليلنا كوبيتين شاى يا أم مجاهد أحسن شايف القعدة عايزة تظبيطة دماغ.. جاءت بالشاى وجلست بجانبه.. كان جالسا فى غاية الانتباه.. بدأ اللقاء.. استهله المذيع بتقديم الضيوف واحدا واحدا وبعد كل اسم الكثير من الألقاب والتاريخ الطويل لأصحابها فى العمل السياسى.
نبدأ اللقاء بسؤال عن موقف الأحزاب من الانتخابات.. رشف أبو مجاهد أول رشفة من كوب الشاى بصوت مرتفع.. قال الرجل أنا رأى أن المقاطعة مش هى الحل لأن المقاطعة موقف سلبى.. وبكده هنترك الساحة لهم يلعبوا فيها لوحدهم وبدون منافسه.
مصمص أبو مجاهد شفتيه.. الراجل ده عنده حق بصحيح.. التفتت إليه أم مجاهد.. هو مين بيلعب مع مين يا حاج..؟؟ استنى بس شوية ياحاجة.. ده لعب تانى غير اللى أنتى فاكراه.
انتقل المذيع لضيف آخر.. وسعادتك أيه رأيك فى المقاطعة..؟؟ عقد الرجل حاجبيه.. أنا شايف أننا لازم نقاطع الانتخابات.. مافيش تكافؤ فرص بين المرشحين ولا توجد شفافية فى التصويت.
وهنا رفع أبو مجاهد كوب الشاى وهو يرشف منه ويمصمص قائلا.. الراجل ده عنده حق وبيقول كلام زى الفل.. قالت أم مجاهد يعنى أيه شفافية يا حاج..؟؟ زاغ ببصره عنها.. استنى يا حاجة بعدين أفطمك على الدور كله.
التفت المذيع لضيف آخر وسعادتك رأيك إيه فى موضوع المقاطعة.. بدا عليه أنه تفاجأ بالسؤال..!! والله أنا شايف أن مقاطعة المنتجات الدانماركية ده واجب قومى ودينى.
ضاقت عين مقدم البرنامج ورفع حاجبيه..!! دنماركية
إيه..!! احنا بنتكلم على مقاطعة الانتخابات..!! أيوه أيوه.. لامؤاخذة.. المقاطعة واجبة بس إحنا برضه ننزل الانتخابات وندعو الشعب لمقاطعة الانتخابات وبكده نكون ضربنا عصفورين بحجر.
هنا رشف أبو مجاهد أخر رشفة فى كوب الشاى وهو يصيح.. أهو هو ده الكلام الفللى عنده حق بصحيح.. وهنا قالت أم مجاهد.. الله هى الانتخابات عندنا ولا فى الدنمارك..!!؟ أصبرى شوية ياحاجة هفهمك بعدين.
التفت المذيع وهو يوجه الكلام لإحداهن ماسمعناش رأى سعادتك.. لأ طبعا.. المشاركه مهمة ودى أول انتخابات يكون فيها كوته للمرأة ودى فرصة متتعوضش علشان المرأه تاخد حقوقها المنهوبة.. قالت أم مجاهد الست دى بتقول أحلى كلام.. بس يعنى إيه الكووتة ياحاج..!!؟
وقبل أن يجيب أبو مجاهد اشتبكت الضيفة مع ضيف آخر.. كوتة إيه وكلام فاضى إيه وحقوق منهوبه إيه..!! ما الستات راكبة ومدلدلة رجليها..!!؟ دى الرجالة اللى عايزلها كوتة فى بيوتها اليومين دول..!! ما تقوليلنا إيه الحقوق اللى منهوبهة من المرأة..!!؟
قال أبو مجاهد الراجل ده بيقول كلام عين العقل.. ماتقولش كده ياحاج..!! الست الكاملة دى هتجبلنا حقنا.. حق إيه اللى هاتجبهولك يا حاجة..!! الصراحة..؟؟ مش عارفة..!!؟
اشتبكت الضيفة مع الضيف وأخذا يتكلمان فى وقت واحد.. وهنا استأذن أحد الضيوف.. معلشى عندى لقاء تانى فى قناة تانية عايز ألحقه.. بس أنت لسه مقلتلناش رأيك..!! على الماشى أقول سواء قاطعنا ولا ماقطعناش كله محصل بعضه..!!
رد أبو مجاهد.. كلامه مظبوط وميه ميه.. التفت لزوجته وجدها قد نامت على الكرسى..!! هزها برفق.. قومى يا أم مجاهد نامى فى السرير.. تنبهت لنفسها.. ماتنساش.. بكره مرشح الحزب هيوزع لحمه.. عارف يا حاجة من النجمة هكون هناك.
رجع أبو مجاهد بعد صلاة العصر وفى يده خمسة أكياس بلاستيك.. أعطاهم لزوجته وعندما فتحتهم وجدت لحمة فى أربعة منهم.
كادت المرأة أن تزغرد.. يادى الهنا يادى الهنا.. اللهم زيد وبارك.. قال الرجل وهو يخلع ملابسه وأنا راجع لفيت على المرشحين واحد واحد كلهم كانوا دابحين.. وإيه الكيس الخامس ده..؟؟
فتحته وجدت فيه أصابع من المحشى الساخن.. ياستى المرشحة عن الدايرة كانت واقفة بتوزعه.. بتقول إنها حشياه بإديها.. تسلم وتسلملنا إديها.. الست دى بركه.
التفتت لزوجها وهو يتمدد فى السرير.. هو أنت هترشح مين ياحاج..؟؟ أرشح..!! هو أنا عندى بطاقه انتخاب أصلا.. أرشح ولا مارشحش كله محصل بعضه والدنيا ماشية..!! الغلابة اللى زينا المهم ياكلوا.. عندك حق.. قالتها وهى تخرج اللحمة من الأكياس وتقول لنفسها يا ريت ما يبطلوش انتخابات طول السنة خلينا ناكل وننبسط.
فى أطراف القرية ووسط الأراضى الزراعية كان جمع غفير من الأهالى يقف أمام قصر من قصور أحد المرشحين.. ومن شرفة فى القصر كان يقف المرشح مع أحدهم يتطلع على المنظر.
بادره الرجل الدبايح بتتوزع وكله تمام التمام.. بس طمنى يا باشا الأخبار إيه..؟؟ اطمئن.. الأدوار اتوزعت والحكاية اترتبت.. وفى سره تصاعدت ضحكة كبيرة وعيناه تتجهان لتجمع الأهالى وهو يقول.. الناس تاخد نصيبها وإحنا ناخد نصيبنا..!!؟
تصاعدت فى الأجواء أصوات المزامير والدفوف والهتافات تصم الآذان.. مر شيخ المسجد ممسكا بيده ابنه الصغير.. هو المولد جه يابا.. أيوه يابنى المولد ابتدى..!! بس ده مولد وصاحبه غايب..!!؟