بحلم أكون لك فارس

مقدرش أقول بحبك
مقدرش أبوح
غير أما أداوى نزف الروح
وأقف فى وش الريح
عارفانى
طول عمرى صريح
يبقى اصبرى لحد ما الحظ يقف ف صفى
وربك يرزق
والخير ورده يطرح ف كفى
فرحة
فرحة ترجع قلبى ليكى
وترجعنى تانى أسكن عنيكى
وأنسى أنى كنت جريح
ساعتها بس أقولك بحبك
وأعشقك وأكون لك
أما دلوقتى سامحينى إزاى ألم ضعفى على ضعفك
وإزاى أغزل ألمى فى ألمك
إزاى وأنا بنزف أداوى جرحك
إزاى وأنا غرقان ف حزنى أكون فرحك
إزاى وأنا مش لاقينى أقول بحبك
وأقول إنك ساكنة قلبى وأن مناى قلبك
هتصدقينى إزاى وأنا مش لاقينى
يبقى ساعتها بتخدعينى
طب فكرى فيها تانى
هتلاقيها مش جايبة همها
إزاى وأنا مهزوم أكون لك فارس
وتأمنينى على عمرك
وإزاى أكون لك حارس وتملكينى أمرك
وإزاى أطالب بحقى ف عنيكى
وأنا مدبوح بدمعك
وإزاى وأنا مش قادر أخدك ف حضنى
وأهزم حزنك
إزاى أبوح وأفضفض وأقولك
وبينى وبينك ألف ميل
ميل شقى
وميل صراخ وعويل
مقدرش أقول بحبك
وأنا مش قادر أكون لك فارس
مش إنتى عاوزانى فارس
ولا أنا اتهيألى
مش أنت عاوزنى حارس
ولا الحلم صور لى
كلام ماهوش حقيقة
ومن جواك بيفتح سكة لأحزانى تعود وتخطفنى
إن كان كده احمينى واقرى تعاويذك تحاوطنى
ومن شيطانى تحرسنى
واصبرى
ف يوم ح أقولك بحبك
وأغنى لك وأعيش لك
إنما دلوقت
قدامى سكة طويلة
على ما أعدى بحور الصمت
وربك وحده العالم
هتاخد قد إيه وقت