الأرض

وزرك ف رقبتى ليوم الدين
بأقولها بأسى وأنا كلى حزين
قالوا دا فرصه تشترى رخيص
أتاريها جرسه والرخيص بخيس
باعوها مره بالشبر ومره بالمتر
أقول لك سر مهواش سر
دول نسيوا الفلاحة
وأصول الزراعة
شاكلهم كده سايقنا لمجاعة
لو هنسوق العوج هتستمر ليوم الساعة
شايف هناااك نخلة
كنت باحسبها نخلة
أتاريها برج عالى جذعها بلاستك
ورقها لونه أخضر
وكمان طرحها أصفر
زرعوها لجل نحصد المر
ونرويها بالكلام لجل تخضر
قلعنا الأصيلة
ومكانها زرعنا العويلة
فيه أكتر من كده نيلة؟
قمحنا وزرعنا صبحنا نزرعه بالتيلة
وقطننا اللى كان طويل التيلة
صبحنا نزرع مكانه م الفدادين برسيم
لجل نشرب عصيره ونبقى أكرم شوية من أى بهيم
بقى يا لق ..مفيش فينا حد حكيم؟
لهو إحنا هنفطر تبن، ولا ناويين تعشونا سوتيه برسيم!
الصورة غامقة مفيهاش ألوان
والعشوائية حوالينا ف كل مكان
وكلامنا كتر ع الفاضى والمليان
ضيعنا عليه فلوس تزرع لها مليون فدان
طب وماله
ما إحنا جرفنا الأرض
وفرطنا ف العرض
ولسه مالينا الفخر إننا حفده الفراعين
اتنيلوا، هو فيه فخر بعد التفريط ف الطين
خسارة الطين والاطيان
وأرض كنا تقيسها بالفدان
إتسرسبت من إيدينا والكل غلطان
قلعوا نخلة طويلة سارحة
بالخير طارحة
شبعت أجيال
وزرعوا مكانها عماير لجل تأوى العيال
بشكل عشوائى خالى من أى نظام
قامت مدن كاملة، دا اسمه كلام
يا أرض جدى اتغطى بيك
وصبحت من غيرك أنا عريان
يلاحقنى عارى كل مكان
عليه العوض فيك ما دمت أنا الغلطان