فندق تعبان.. نجيل طويل.. أوضة ضلمة.. وبعدهالك يا عمنا

لازززم نكسب.. كلمة بيقولها كل مصرى يقابلنا فى مصر وضواحيها!
الناس مش هاتقبل غير الفوز على نيجيريا فى مباراتى التأهل لأمم أفريقيا 2017!
الفوز.. يبدأ فى مباراة الذهاب بأداء شجاع وتهديد لمرمى النسور الخضر.. ومش أى حاجة تانية!
يا سادة فى المنتخب.. أى بنى آدم عنده ظروف.. ماينفعناش!
طبعًا.. الظروف تبدأ بأن حضرته مستاء من الفندق، أو الملعب، أو النجيل الطويل، والهوا اللى مش عليل، لازم ياخد قرار عاجل بعدم وجع دماغه والبقاء فى المحروسة حيث فنادق الخمس نجوم، والعيشة الهينة، واللقمة المستوية!
جميل أن يسبق المهندس إيهاب لهيطة، منسق المنتخب، الفريق ليرى تفاصيل الإقامة التى لن تستمر كثيرًا!
لكن الأجمل ألا يتم تحريف كلام لهيطة!
أيوه.. الراجل نقل فى تقريره كل صغيرة وكبيرة علشان مايكونش فيه مفاجآت!
ماشى.. إنما يبقى المعنى الواضح أن ده هو المتوفر بالأسواق الأفريقية.. عادى جدًا!
يا سادة فى جهاز المنتخب.. اللى خايف سيبوه يروح!
كمان.. الكورة كانت وستظل لعبة رجالة، يعنى لا يمكن أن يتأففوا من شكل الإقامة، حتى لو كان المبيت فى كوخ!
يا رجالة.. أهى نومة والسلام!
الأكل.. ربنا يوسع علينا وعليكم وعليهم.. ممكن يكون فى الطيارة الخاصة!
فول بقى.. طعمية.. فراخ.. لحمة من اللى هيه.. مش هاتفرق خالص!
أقولكم.. خدوا معاكم كمان «طرشى».. ولا يهمنا.. الأهم يكون المكسب عندنا!
يا سادة فى الجهاز الفنى.. من منكم لم يلعب فى الحوارى، وعلى أرضيات تراب وأسفلت، أو مراكز شباب من اللى ملاعبها كأنها نجيل وفيه حفر.. يتفضل يرمى الأحجار على نيجيريا!
أظن.. وأغلب الظن فى الكورة حقيقة.. أن «كوبر» ذات نفسه من حوارى الأرجنتين!
بكل تأكيد فهذه هى معادلة كرة القدم.. يا أفندم!
اللى مش مصدق يتفضل يسأل «مالودا» دجلة.. لم يشكُ من أرضية أى ملعب، ولا من الأكل، ولا من الترحال فى محافظات مصر!
مش كده وبس!
لأ.. ده كمان بيلعب بمنتهى الرشاقة.. وتمريراته حريرية.. ولا إصابة.. ولا «دياولو» يا حضرات.. مش كده؟!
يا سادة فى الجهاز الفنى.. عليكم بعرض تقرير لهيطة على اللاعبين، مع كلام واضح، أن أى نجم مش عايز يلعب فى الظروف دى يتفضل يقول!
اسألوهم.. هاتلاقوهم ولاد كل حتة فى مصر.. الننى.. منين!
الفرعون صلاح.. من فين؟!
كوكا.. ووردة.. وغيرهم.. وغيرهم.. هما دول ولاد البلد دى بشوارعها وحواريها!
الله يرحمك يا كابتن جوهرى.. كانت هذه هى خلاصة ما بعد محاضراته الفنية!
يا سادة فى الجهاز الفنى.. الخماسى المحترف جدًا أكيد هانشوفه فى الملعب!
بالطبع.. الننى مدافع الوسط.. صلاح وكوكا مهاجمان.. تريزيجيه فى الناحية اليمين.. ووردة موجود بالطبع!
حراسة المرمى.. الحضرى ولا أحد غيره.. يا عم ناجى الدولى خالص جدًا عصام الحضرى سيمثل حملاً نفسيًا على الهجوم النيجيرى.. ده كلام كورة!
المدافعان.. حجازى وربيعة حافظين بعض جدًا جدًا.. والباقى مافيهوش كلام برضه؟!
يا سادة فى الجهاز الفنى.. الوصول إلى أمم أفريقيا 2017 أمانة.. ولا أعتقد أنها ثقيلة!
بس محتاجة شجاعة وقلب حديد.. العبوا بخطة «بريف هارت».. وتوكلوا على الله!