قررنا في حوارنا نعمل خبطة صحفية ونستضيف شخصية جامدة جدًّا.. صيتها واصل للعالم كله.. من صفط اللبن لحد بورتو السخنة.. ومن الدويقة لحد مدينتي.. من أمريكا اللاتينية لكوريا الجنوبية ومن أحراش المنوفية لحد إسطبل عنتر.. حوارنا مع لاعب مثقف " بيسمع منير ".. وبيقعد أحيانًا ع البورصة في شارع الأرجنتين الرئيسي وأحيانًا أخرى على التكعيبة.. حوارنا هذه المرة من حظ ونصيب لاعب محترم محترف وابن ناس طيبين.. بيلعب برجليه الاتنين.. بيشوط ولا أبو تريكه في زمانه.. بيقف جون ولا الحضري في مكانه " أيام زمان ".. واد لاعيب ما جابيتوش ولادة.. اتمرمط في الساحات الشعبية.. وسف نجيلة أندية الدرجة التالتة.. ودوري المظاليم في الأرجنتين.. إنه " ميسي ".. اللاعب الذي ظل زمانًا يحلم بفردة حذاء ماركة باتا ليقذف بها الضربات الترجيحية.. لكن هيهات هيهات.. هي فردة حذاء واحده بعد مماطلات ومفاوضات مع إدارة النادي.. والتي منحته إياها بعد الفوز على نادي إسبانيول.. وكان لنا معه هذا الحوار... - عرَّفنا بنفسك؟ - ميسي السيد ميسي.. عندي حاجة وعشرين سنة.. من مكان شعبي في الأرجنتين.. من حارة دي ماريا.. وبلعب كورة من وأنا عيل صغير.. كنت بهرب من المدرسة وأروح ألعب في الساحة الشعبية. - عجباني قصة شعرك يا ميسي، إنت بتحلق عند مين؟ - الواد حمادة فازلين هو اللي محنتف لي القصة قبل ما آجي هنا.. وللعلم.. حمادة فازلين هو المزيِّن الخصوصي لكابتن إبراهيم سعيد أيام ماكان في إبراهيم سعيد ! - كلمنا عن بداياتك وموهبتك ومين اللي اكتشفك؟ - أنا من صغري وأنا بحب الكورة.. كنت بلعب مع أصحابي أليساندرو وهرنانديز في الساحة الشعبية.. وهناك اكتشفني عم لوبيز البواب الله يمسيه.. - البواب اللي اكتشفك؟! أمال فين المدرب؟ - عندنا في الأرجنيتن كله بيلعب كورة.. من أول البواب لحد الرئيس.. والملاعب موجودة في كل حتة.. علشان كده ممكن تلاقي سواق بيفهم في الكورة أحسن من المحللين الكرويين بتوعكم اللي بيحبوا اللت والعجن زي " علاء صادق " مثلا ! - قول لي يا ميسي.. بعد تجربتك الناجحة مع برشلونة.. إيه هو هدفك القادم؟ - برشلونة كان خطوة في طريقي للنجومية.. بس هدفي القادم إني ألعب مع فريق السكة الحديد.. والحمد لله بعد مفاوضات كبيرة قدرت أقنع الكابتن حماده الأشول إنه يضمني علشان ألعب مع فريق السكة الحديد الموسم الجديد.. بس هو أصر إنه يعمل لي اختبارات ويعرضني على الدكتور سيد دروكبة علشان الكشف الطبي! - مبروك يا ميسي.. بس يا ريت تستفيد من خبرات النجوم اللي معاك؟ - طبعًا طبعًا.. كفاية إني هلعب جنب الكابتن الكبير حمو ركب، والمدافع الصلب كريم كباري، والحارس الكبير ممدوح الخرم. - وإيه طموحاتك في الفترة اللي جايه بعد نادي السكة الحديد؟ - إني أحقق حلمي وألبس الفنلة الحمرا.. طبعًا بحترم نادي الزمالك والكابت مرتضى منصور.. بس أنا أهلاوي من صغري.. يااااااااه يا باشا.. دا من صغري وأنا بحلم باليوم اللي ألعب فيه جنب الكابتن بركات وأبو تريكه هما اعتزلوا بس مش مشكلة المهم روح صالح سليم والفانلة الحمرا.. - ومين هو مثلك الأعلى؟ أكيد مارادونا أو بيليه.. - مارادونا مين، صحيح أنا بحبه علشان بيفضل يحضنِّي ويطبطب عليَّا.. وكمان بيلعبلي في شعري.. بس أنا مثلي الأعلى الكابتن محمد ناجي جدو وقبلها الكابتن عماد متعب قبل ما يتجوز ! - إيه هي أحلامك في الفترة الجايه؟ - آخد شقة إيجار جديد واتجوز واتستر بقا ! - إيه رأيك في مستوى الأرجنتين في كأس العالم؟ - إحنا بنعمل اللي علينا كل مرة.. بس تقريبا الماركة بتاعة الفانلات بتبقى تعبانة.. ودا طبعًا بيأثر على نفسية اللعيبة.. - إيه رأيك في مستقبل الكورة في الأرجنتين؟ - في شوية عيال زي الفل.. أمال إيه.. دا إحنا بلد معجونة كورة.. ما تخافش المستقبل كله أجوان، أنا من شهرين شفت شوية عيال كانوا هربانين من المدرسة، وكانوا بيلعبوا كورة في الشارع.. إنما إيه.. عيال من الآخر.. بس أنا اضايقت أوي.. ونصحتهم. - نصحتهم بإيه؟ إنهم ما يهربوش من المدرسة تاني؟ - لا يا عم.. هما اللي اتعلموا خدوا إيه؟ عندك أنا أهو.. دبلوم زراعة قد الدنيا.. وفي الآخر ما اشتغلتش بيه.. أنا نصحتهم يلعبوا على فلوس.. علشان اللعب يسخن ويحلو ! - كلمنا عن دور الحب في حياتك.. - ياااااه.. جيت ع الجرح يا أستاذ.. فكرتني بالبت مادونا بنت عم سيلفا بتاع الحلبسة اللي ساكنة جنب مصنع الكراسي.. الحب الأول في حياتي كنت آخدها ونقعد على الكورنيش وناكل درة.. ونضرب سيجارتين البانجو.. ونرجع قبل الليل ما يدخل علينا.. أصلها متربية وبتخاف على سمعتها! - واضح يا ميسي إنها كانت متربية، وإيه اللي حصل بعد كده؟ - أبوها الله يسامحه.. قفشها مرة معايا في غرزة (عبده حشيش).. وشك فيها.. مع إننا ما كناش بنعمل حاجة غلط.. كل الحكاية إننا كنا بنضرب جوانين مع ازازتين بيرة ! - فعلًا أبوها ظلمكوا.. ها وبعدين إيه اللي حصل؟ - بس يا سيدي.. حبسها في البيت ورأسه وألف سيف إننا نتجوز.. بس أنا ما معيش لا شقة ولا مهر.. ولا حتى معايا أدفع مقدم غسالة.. فعملت ندل وخلعت.. ومن ساعتها وأنا زاهد الحريم.. ما عرفتش بعديها غير 87 واحدة بس.. وده لأن صورتها ما كانتش بتفارق خيالي ! - إيه هواياتك غير كرة القدم؟ - كرة الماء والبلاي ستيشن ونط الحبل.. بس أحلى هواية بقا صلَّح.. دا أنا كنت باخد ضرب.. ودلوقتي بقيت بروح الجيم.. مش شايف العضلات؟! - عضلات إيه بس؟ داري يا عم لا يمسكونا آداب.. مش ناقصة.. قول لي مين أكتر الفنانين اللي بتحبهم وبيعجبك تمثيلهم؟ - الأستاذ جورج كلوني.. ومدام نادية الجندي.. دي يا راجل بتمثل وهي نايمة.. والريس المعزول محمد مرسي.. كان بيضحكني أوي الصراحة ! - صحيح يا ميسي.. بما إنك في مصر.. يا ترى شربت من نيلها؟ - شربت يا باشا من نيلها.. أمال البلهارسيا اللي جاتلي دي جاتلي من فين يعني؟ وكمان فضلت أغنيلها زي ما قالت الأستاذة شيرين لحد ما جالي التهاب رئوي من الدخان والهوا بتاع الشوارع.. - إيه هي عيوبك؟ - إني طيب أوي.. وحنين.. وعصبي ساعات... - هو كل أما نسأل واحد يقول لنا عيوبه إنه عصبي وطيب؟ إيه.. مفيش حد يقول إنه بخيل، أو بتاع نسوان، أو بيشرب حشيش، أو منافق... إيه.. كلكو ملايكة ولا إيه؟! وإيه التيشيرتات الجامدة دي؟ شكلك قابض ومريِّش.. - يا عم دا من الوكالة تقليد.. ما كل حاجة بتتقلد وتتسرق.. دا النوكيا ضربوه هو والترامادول يا راجل.. دي علبة الأماينو بقت تعدي الخمسين جنيه دلوقتي! - مين أكتر فنان بتحب تسمعله؟ - مايكل جاكسون طبعًا.. وسيلين ديون.. والفنان الكبير أوي العالمي.. نجم صفط اللبن وشبرا وباريس ونيويورك وكل حورايهم.. عبد الباسط حمودة وحماده الليثي ! - إيه رأيك في الكرة المصرية؟ - اللعيبة جامدين جدًّا.. بس المشكلة إنهم بيدَّلعوا وبياكلوا فول ومحشي كتير.. علشان كدا ما ينفعوش للاحتراف، كمان اللعيب من دول لو لعب ماتش حلو ما تعرفش تكلمه بعد كدا، وكأنه بقا بيليه أو مارادونا، ويفضل عايش ع الماتش دا بقية حياته. - شايف فرص مصر في الصعود لكأس العالم ازاي؟ - الأمل موجود.. وبمجهود اللعيبة ودعاء الجماهير ممكن يصعدوا على 2050، لما يخلُّوا الصعود لكأس العالم بالقرعة.. - إيه أكتر حاجة عجبتك في الفترة اللي قعدتها هنا؟ - الناس الطيبين.. والحرنكش.. وساندي دي عاملة قلق يا جدع.. دا العيال في الأرجنتين بيتفرجوا على الكليبات بتاعهتا في الخباثة كأنه حشيش بالظبط. - وإيه أكتر حاجة ما عجبتكش في مصر؟ - بصراحة كده يا أستاذ محدِّش هنا بيعمل شغله بضمير، الموظف يسهر في بيتهم للصبح قدام روتانا أفلام وقناة دلع ويروح ينام في الشغل، واللعيب من دول لو المدرب قريبه من بعيد أو عنده واسطة تلاقيه بيلعب أساسي، مع إن في أحسن منه مية مرة قاعد ع الدكة، ومعظم الناس في مصر كل همهم إنهم يقبضوا الفلوس أول كل شهر.. ما بيبصوش إنهم اشتغلوا أو يستحقوا الفلوس دي ولا لأ.. بس إنت عارف إيه هي مشكلتكوا الحقيقية؟ - إيه يا عم الفليسوف؟ - إنكم ما تعرفوش قيمة بلدكوا، وما تعرفوش حاجة عن تاريخكم، طب قول لي إنت تعرف إيه عن الحضارة الفرعونية؟ - إنت فاكرني شاب سيس ما اعرفش حاجة ولا إيه؟ لا يا باشا.. دا إحنا اللي خرمنا الأوزون! - يا عم إنجز.. إحنا ما بناخدش منكم غير كلام، تعرف إيه عن الحضارة الفرعونية؟ - يا باشا إحنا سبع تلاف سنة حضارة، والفراعنة دول كانوا ناس جامدين جدًّا.. كفاية إنهم بنوا الأهرامات.. - دا اللي تعرفه عن الحضارة الفرعونية؟ - يا عم اصبر بس.. كمان بنوا أبو الهول.. وكانوا بيكتبوا على ورق البردي، علشان تعرف بس إننا عارفين تاريخ بلدنا كويس أوي. - تعرف إن أي سائح بييجي مصر بيكون عارف تاريخها أكتر من ناس كتير من أهلها، أنا جيت مصر مرة واحدة قبل كدا.. بس قريت عن التاريخ الفرعوني أكتر من معظم المصريين، الحضارة الفرعونية حضارة عظيمة جدًّا.. بتدل إن المصري كان بيمتلك ذكاء وحكمة وإصرار وعزيمة وحب وتفاني في العمل.. ودا اللي خلاه يأسس أول دولة كاملة الأركان، الموضوع كله إنكم زهقتونا كل ما حد يكلمكم عن التقدُّم تفضلوا تقولوا إحنا سبع تلاف سنة حضارة.. وإنتم أصلًا ما تعرفوش حاجة عن تاريخكم، المفروض تدرسوا حضارتكم وتستفيدوا منها.. وتاخدوها نقطة انطلاق لبناء حضارة جديدة يفتخر بيها أحفادكم بعد آلاف السنين، زمان أجدادكم كان بيصنعوا كل حاجة.. والعالم كله كان بيتعلم منهم، إنما دلوقتي هما بقوا بيصنعوا الصواريخ، وإنتم بقيتوا بتستوردوا الفوانيس، يا ريت أحفادكمبعد مائة سنة يلاقوا حاجة غير الأهرمات يفتخروا بيها.. تكون من صنع أيديكم.. - يا ابن اللعيبة.. حفظت الكلام دا كله إمتى؟ بس تصدق يا ميسي.. والنعمة إنت طلعت برنس وبتفهم، دا إنت أحسن من الناس اللي بيطلعوا في التليفزيون، وعلى فكرة.. أنا عارف الحاجات اللي قلتلها دي.. إحنا جامدين برضو.. كفاية إننا أبطال أفريقيا تلات مرات ورا بعض! في نهاية حوارنا بنشكر الكابتن ميسي السيد ميسي نجم برشلونة والساحة الشعبية بصفط اللبن.. الذي تلقَّى عرضًا مؤخرًا بعد أن قام بصبغ شعره بماء الأكسجين ليلعب لنادي السكة الحديد محطة قليوب البلد.. مقابل 400 جنيه في الشهر وشقة في الإيواء 56 متر.. بالإضافة اللي كوتشي ماركة باتا " فردتين ".. ونتمنى له التوفيق في مسيرته الكروية...
لمتابعة الكاتب https://www.facebook.com/elzamzamy https://twitter.com/elpostagy
