دعوات الشاطر مقابل الإطاحة بمرسى

-المرشد: إيه يا باشمهندش "خيرت"، ليه مش بتدعى على العيال بتوع المعارضة دول، ربنا ياخدهم ويريحنا منهم، إنت عارف إنهم مخليين شكلنا وحش أوى.
-خيرت: والله، من غير ما تقول فضيلتك، بدعى عليهم من فترة،ولا بيجرى لهم حاجة.
-المرشد: لأ.. يا باشمهندس، إنت لازم تدعى على كل أطياف المعارضة، ربنا يخرب بيوتهم ويفرق شملهم.
-خيرت: هحاول يا فضيلة المرشد.
-المرشد: مفيش حاجة اسمها "هتحاول"، إنت تقوم دلوقتى من مكانك وتتوضا وتصلى بتاع 200 ركعة وخصص كل ركعتين للرجالة اللى عاملين فيها معارضين وثوار، وتدعى عليهم بالويل والثبور وعظائم الأمور، ومتقلش مش فاضى تانى يا خيرت عشان مزعلش منك، أنا قلت للشعب إنك مستجاب الدعوة، ومينفعش تطلعنى صُغيّر.
-خيرت: ربنا يسهل فضيلتك.
-المرشد: شكلك بتنفضلى يا خيرت، وده مش حلو وكدة هزعل منك.
-خيرت: يعنى إيه بنفضلك، عموما أنا مش فاضى دلوقتى أدعى على حد، وكمان ماليش مزاج.
-المرشد: يعنى إيه ملكش مزاج، إنت لازم تقول لى: سمعا وطاعة وتنفذ أوامرى.
-خيرت: فضيلة المرشد، أرجوك بلاش صوت عالى متنساش أنا بعمل إيه من أجلكم أنا بتاع الفلوس يا صاحب الفضيلة ولو كنت ناسى أفكرك.
-المرشد: فلوس، فلوس، فيه إيه يا خيرت إنت هتعايرنا ولا إيه هى الفلوس بتجيبها لوحدك؟ ما الجماعة بتساعدك فيها..
-خيرت: جماعة مين فضيلتك، أنا الجماعة، والجماعة أنا، ولا أنت هتكبر عليا؟
-المرشد: إيه يا خيرت، فيه إيه؟ شكلك ضارب ترامادول ولا فيه إيه بالضبط؟
-خيرت: فيه عدس أغرف لك؟!
-المرشد: مالك يا خيرت، إيه اللى جرا لك؟ عمرك ما كنت كدة، إحنا اتحسدنا ولا إيه؟
-خيرت: بص يا فضيلة المرشد، إنا حاطط فى قلبى وساكت وعامل احترام ليك.
-المرشد: حاطط فى قلبك من مين؟
-خيرت: من الجماعة كلها، واحد واحد، وأنا النظام ده مش عاجبنى.
-المرشد: إهدى يا باشمهندس، ادعى بس إنت على العيال بتوع المعارضة دول ربنا ياخد أجلهم، وبعد كدة نقعد ونشوف إيه اللى مزعلك.
-خيرت: لأ نقعد الأول وبعد كدة أدعيلك على اللى إنت عاوزه.
-المرشد: إنت كدة بتساومنى يا خيرت، وأنا مش متعود منك على كدة
-خيرت: اعتبرها زى ما تعتبرها، أنا قلت لك اللى عندى.
-المرشد: إيه طلباتك يا عم خيرت؟
-خيرت: إنت عارف يا فضيلة المرشد إن أنا كنت أولى من الأخ مرسى برئاسة مصر.
-المرشد: ما إحنا معارضناش يا خيرت، بس إنت عارف اللعبة اللى عملها المجلس العسكرى عشان يبعدك.
-خيرت: ده كان زمان، إنما دلوقتى ممكن حاجات كتير تتغير.
-المرشد: يعنى إيه المطلوب؟
-خيرت: أبقى أنا الرئيس.
-المرشد: طيب إزاى؟
-خيرت: زى الناس، ولو وافقت هدعيلك على كل اللى يزعلك.
-المرشد: بس يا ابنى ده صعب.
-خيرت: ابنك فى بطنك يا فضيلة المرشد.
-المرشد: طيب ومرسى نوديه فين؟
-خيرت: وهى دى صعبة؟ زى ما ودينا غيره ونتهم المعارضة والجماعة بتوع جبهة الإنقاذ باغتياله، وكدة نبقى ضربنا عصفورين بحجر.
-المرشد: تصدق فكرة جامدة طحن.
-خيرت: اتفقنا.
-المرشد: والتنفيذ هيبقى ازاى؟
-خيرت: دى لعبتى يا فضيلة المرشد.