محمد نور يكتب: خطايا باسم بن يوسف

بقى كده برضه يا عم باسم،تزعل بابا منك،وتخليه يبعتك للنائب الخاص آآسف قصدى النائب العام،وياريت جت على كده وبس،لا ده أنت هاتتسبب فى قفل القناة وقطع عيش الناس اللى شغاليين فيها،وإللى فاتحه بيوت ناس تانيه كتير.يا راجل حرام عليك إنت فاكر إننا فى بلد ديموقراطية بجد ولا إيه،ولا تكون صدّقت الوعود البراقة إللى قالت إن هيبقى فيه إعلام حر،وإن مفيش جورنال هايتقفل،وإن محدش هايتحبس بسبب رأى،أو كلمة .

ولا يكون خال عليك الكلام بتاع إن مفيش قلم هايتكسر،بالرغم من أن كل الأقلام تقريباّ إتكسرت،وإن فيه حرية بجد،والكلام إللى بالك منه ده.

بس قولى يا بسومه إيه إللى مزعلك من طاقية الدكتوراه مش برضه الطاقية دى بتاعة الناس العلماء،والمفكرين،ولا أنت غيران بقى ولا إيه.أه أكيد كده شكلك غيران والدليل على كده إنك عملت واحده أكبر منها ولبستها،وأنت خارج من التحقيق آآسف مرة تانيه قصدى من التحرير.

نسيت صحيح أباركلك،يا سيدى ألف ألف مبروك على الحرية،ولو إنها كلفتك خمستاشر باكو بس برضه ألف مبروك،كله يهون من أجل الديموقراطية،وخلى بالك إنك لسه هتدفعلك كام باكو كمان،ولا إنت مش واخد بالك برضه إن التسعيرة دلوقتى بقت خمسين باكو.

وإزاى يا جدع إنت تذدرى الدين مش إنت مسلم برضه ولا إيه،وعارف إن كده حرام،ولو إنى مش عارف إنت أسأت للدين فى إيه،وبالرغم من أن ربنا سبحانه وتعالى وحده بس هو إللى مطلع على القلوب،بس برضه إزاى تعمل كده يا باسم.

وكمان مش عايزك تعمل دونت ميكس بين الحرية،والمهلبية عشان خاطر خمسه سته سبعه أربعه تلاته مش عاجبينك،ومش على مزاجك.

بس أنا بدى أعرف حاجه:هو ليه الناس دى مفروسين منك أوى كده يا باسم،يمكن عشان ليك معجبين كتير..طب ما هم قالوا قبل كده إنهم يقدروا يحشدوا الملايين إللى برضه مش عارف هي فين الملايين دى!!!ده كمان بالإضافة إلى أن الشعب كله بيأيدهم،وأن الشعب ده هو إللى إختارهم،وقال إيه يا سيدى الصناديق هى الحكم!!!

ولا يمكن عشان برنامجك ناجح،وهما فاشلين إعلامياً،ومش عارفين يبقوا ناجحين زيك،مع إنهم ماشاء الله معاهم كل الإمكانات،ومش ناقصهم حاجة إلا حاجة واحدة بس؟أكيد طبعاً إنت عارف إيه هى الحاجة دى،ولو مش عارف هبقى أقول لك بينى وبينك.

أنا قلت أنصحك لوجه الله تعالى،وكده يا عم باسم أنا خلصت ذمتى من ربنا عشان إنت حبيب قلبى،ولأنى خايف عليك مع إنهم لسه بيقولوا إن في حرية رأى،وإن عصر القمع والإرهاب الفكرى قد إنتهى بلا رجعة،وإننا بنعيش أزهى عصور الديموقراطية إللى بصراحة مش عارف لإمتى هتفضل مخاصمة الشعب المصرى وواخده على خاطرها منه،مع العلم أنا مش عارف هم يقصدوا أى بلد بالموضوع ده.

عموماً ربنا يسترها علينا،وعليك،ويكفينا شر حرية،وديموقراطية النهضة،وإحمد ربنا إن المرة دى عدت على خير،ومتعملش كده تانى يا عم باسم ولا أقولك خد راحتك.

ف.....

(إرادة الشعب حتماً ستنتصر)