توبة مسئول

المسئول أبو دم خفيف
قرر أنه يتوب من الصيف
حيث رأى ان الجو مخيف
حس بأن الناس حرانة
وأنها منه كتير زعلانه
وأنها طول الليل سهرانه
وبتتعشى بنص رغيف
قلبه اتشحتف لما قالو لو
إن ف ناس نفسها تشكيله
بس تخاف لتروح متجيش
فكر أنه يشوف مشاكلهم
فورا حالا وانه يزورهم
يسمع منهم ومايمشيش
قال لمراته انا م اليوم
لازم اخلص أى هموم
هجمع كل الناس والقوم
واعلن توبتى وانى هاكون
تحت الخدمه وتحت العون
وانى راح انصر اى مظلوم
وانى هخلى الفقرا تعوم
جوه الخير وفلوس بالكوم
ام ولاده قالت له يا جوزي
نفس الناس يبقالها جاكوزى
وأن يكون لها فيزا ف بنك
بدل الذل وعيشته الضنك
قالها طبعا طبعا لازم
انا قررت أنى اكون حازم
كل الناس هتعيش ف رخاء
بعد ما كانت عايشه عناء
انا راح اعيش علشان مطالبهم
عمرى ف مره ما هرضى أ سيبهم
واللى مهاجر بره هاجيبه
بدل الذل ف ارض الغير
ام ولاده قالتلو بجد
لما بتوعد توفى العهد
انا مبسوطه عشان غيرت
نفسك من تانى وبدلت
قالها شعبى حبيبى ظلمته
نفسى تعود من تانى حلاوته
اصلى كتير من الفرح حرمته
واستخسرت عليه الطير
مهما راح اعمل مش هوفى له
حقه عليا ومهما ادى له
لسه دا حقه عليا كتير
هى دى قصة أى مسئول
واللى يعيش ف الدنيا ينول
كان يا ما كان وبلاش اوهام
اياك تنطق بعد اليوم
او تستفسر ع المعلوم
لسه مجاش ف بلادنا صلاح
واللى بنحلم بيه اهو راح
كله كلام من تانى و ساح
ضاقت بعد ما عشنا براح
وانا بعلن من هذا اليوم
ان لايمكن يجى اليوم
اللى تشوف مسئول بيتوب
يتبرأ من أى عيوب
دا المسئول ف بلادنا يعيش
واحنا نموت ذل وتلطيش
هو حبيبنا وغيره مفيييييش