16 شركة كروية «مضروبة» باسم الأندية.. إلحقى يا حكومة!!

لم يعلق أحد حتى الآن.. والمؤكد أننا لن نسمع تعليقاً على تصريح الحاج محمود الشامى بأن 16 ناديا تقدمت بأوراق كاملة، وأصبح يحق لها الحصول على رخص محترفة، حتى يتحول الدورى المصرى إلى دورى محترفين!
لغاية كده.. وطبعاً أى حد ممكن يقول: طيب فيها إيه.. يا عم أنت وهو.. ما أنتم بتطالبوا بالاحتراف التام، أو الموت الزؤام!
لا.. يا سادة.. فيها حاجات كتير؟!
أولاً.. وأخيراً.. ونهائياً جداً.. أول وآخر وأهم طلب للاحتراف الكامل هو أن يتم تشكيل شركة كرة قدم، لا شأن لها بالنادى.. ماشى حضرتك؟!
قول ماشى.. طيب إيه بقى؟! أبداً يا أفندم.. من أين لهم هذه الشركات.. فقط يمكن أن تكون شركة وادى دجلة.. المقاصة.. الجونة.. وربما إنبى وبتروجت.. المهم سيبنا أن دولم شركات.. وتعالى نروح معاك للمصيبة.. آى والله مصيبة!
كيف يمكن.. ومين سمح بأن الأهلى، أو الزمالك، أو أى نادٍ بأن يأتى بمجلس إدارة لشركة الكورة؟
عارفين يعنى إيه؟!
أقول لحضراتكم.. الأهلى مثلاً عنده تقييم مالى= 195 مليون جنيه.. ماشى؟!
على فكرة ده مجرد تقييم!
يعنى الشركة اللى هاتييجى دى.. مجلس إدارتها هايدير 195 مليون جنيه غير الإعلانات والحركات.. طيب!
المجلس ده إيه هو رأس ماله؟!
طيب تانى.. المجلس ده مين اختاره؟!
طيب.. السادة أعضاء الجمعية العمومية اللى بيدفعوا.. وغيرهم دفعوا قيمة كل الفلوس.. اللى موجودة.. دى.. وصفهم إيه حضرتك؟!
الرد غريب.. يا جماعة دول مالهومش دعوة بشركة الكورة.. دولم ليهم النادى والمراجيح.. والمطاعم يكلوا فيها.. وباقى الألعاب لأولادهم علشان ينتخبوا مجلس إدارة.. يروح يتفق على بيزنس الكورة، مع الشركة الجهنمية!
طبعاً.. حضرتك مافهمتش حاجة، زى العبد لله؟!
مين هايدفع رأس مال فى شراكة مع أصحاب الأسهم.. نعم يا أفندم.. أصحاب أسهم إيه؟!
حضرتك أعضاء الجمعية العمومية.. اللى دفعوا ملايين موملينة تتقنل إلى مليارات مومليرة.. علشان أول ما يفتحوا الاحتراف، تتعمل تحويلة ويتم اختيار مجموعة من المسوقين الجدعان، ليحققوا مكاسب!
طيب المكاسب دى لمين؟!
يا شطار.. هايخلوا إيدكم تتقطع من التصفيق.. ودموعكم ماتنشفش من البكاء عقب فرحة الفوز بالدورى والكاس وكل الحاجات!
طيب فين رأس المال؟!
يقولك يا عم افهم، موجود.. والناس.. اللى هما طبعاً مجلس إدارة شركة الكورة المحترفة.. هايجيبوا إعلانات ورعاة آى ييى ياه!
كمان يعنى هايكلوها ولعة.. آهه يا واد يا ولعة؟!
المدهش.. إن الجمعيات العمومية للأندية بتاعة الرز واللبن والمهلبية.. لا تعرف إن 16 مجلس إدارة قدموا أوراقا كاملة عن الاحتراف.. على رأسها وفى القلب منها كما قلنا لحضراتكم أوراق تأسيس شركة الكورة.. لصاحبها عجورة!
يحدث هذا.. ولا يتدخل أحد.. وحتى الآن، لم يعِ أعضاء الأندية الذين يجب أن يعرفوا أنهم أصحاب المال الحكاية.. لأنها مشيت بسرعة!
إنما قبل ما ندخل فى الحيط.. بنقول آهه: يا حكومة.. يا معالى رئيس الوزراء: المساهمون حق أعضاء الجمعية العمومية.. لو حضرتك ماسمعتش الحكاية بنقول آهه!
سيادتك بدل ما نصحى الصبح نلاقى «شركة الزمهلاوية للكرة والحاجات» لصاحبها سيد حركات وأولاده!